韓國料理一定要出街先食到？以後喺屋企都煮得喇！韓國人氣超市emart旗下食品品牌Peacock，已經登陸香港超市！全系列有成過百款食品，包括小菜、湯品、調味料、飲品、飯麵等一應俱全，即刻睇睇有邊款啱食先！ 

emart為韓國大型連鎖超市，Peacock為旗下最新食品品牌，食品通過星級酒店名廚及大學食品營養學系團隊品評。過百款食品好齊全，乾貨主要為調味料、咖啡、茶包等，有傳統韓式辣椒粉、芝麻油、醃肉醬料，亦有叮叮飯、飯素及整蛋糕曲奇的麵粉等。

即食食品有分急凍及冰鮮類，有即食人蔘雞湯、大醬湯、泡菜煎餅、炸醬麵甚至係炸雞，款式及口味非常多。大部分都係熟食，用微波爐或者簡單烹調已經煮到，就算係地獄廚神，都唔怕買返屋企唔識整！

今次試咗5款食品，睇吓味道伏唔伏先，所有食品都有英文成份及煮法指示，唔會睇唔明。。呢款韓式紅米飯，選用「一見鍾情」米加糙米而成。叮叮飯一包有三盒，唔使加水，打開蓋就可以放入微波爐叮2分鐘食得。叮完飯粒柔軟唔乾，黏性高，都幾香，雖然帶微黃色但其實冇乜其他味道，份量都夠一人食用。

叮叮炸雞（$43.9）就冇咁理想喇。將急凍炸雞連盒放入微波爐，唔使解凍，叮2分至2分半鐘左右，再攤1分鐘就食得。叮緊同打開蓋時都有辣醬香味，不過質感就相當麻麻，外層好腍，而且炸粉相當厚，雞肉好少，唔得呀。

人蔘雞湯 （$84.9）可以選擇用包放入滾水加熱，或者將湯倒出，放入微波爐叮。人參雞有兩人份量，有原隻雞、半條人蔘、糯米、栗子等，好足料！湯頭冇糯米咁重人蔘味，但都好香甜，雞肉都仲滑，係略嫌油膩咗少少，飲前隔一隔油會好啲。

泡菜煎餅 （$55）一包有三塊，加油煎香即可，不過要煎得靚都唔係咁易，亦可以選擇用焗爐。食落有好多泡菜，有濃郁泡菜酸香，厚薄適中，（煎得好的話）仲有少少脆皮效果，真係似餐廳食到咁！

個人心水推介係呢款韓式彥陽式牛肉（$91.5）！一盒有兩份，唔使落油，落鑊用中火炒3分鐘即可。牛肉一啲都唔韌，炒完仍然好juicy，而且調味帶甜好開胃，送飯一流！最重要係手殘如我都煮到，買定幾盒看門口都唔錯。

所有Peacock食品於Market Place by Jasons、3hreesixty及Jasons Food & Living有售。

文、相、片：Perrins