關注組推介！香港5大室內釣蝦場 $100/小時起即釣即燒

唔單止泰國同台灣，近年香港都開始興起釣蝦，釣到好有成功感之餘，更可以即釣即燒即食！而且唔少釣蝦場都有職員協助，加上設備齊全，無論係新手定小朋友都唔使驚唔識釣。今次開飯仔就幫大家整理五間網上關注組組員推介嘅室內釣蝦場，Bookmark定放假就可以去啦。

新蒲崗6000呎新場 HABO室內釣蝦場

呢個室內釣蝦場喺2022年年底開業，佔地約6000平方呎，有兩個釣蝦池可以容納約100人。唔使驚太多人釣走晒啲蝦，因為餐廳承諾每個鐘都會加入新鮮蝦隻，確保蝦隻數目同活躍度。最貼心嘅係萬一真係一隻蝦都釣唔到，保底都會有五隻蝦畀你！

釣蝦收費：1小時$140，2小時$250，3小時$340，4小時$410

蝦處理方法：直接取走或交由職員現場烹調，基本煮法薑蔥白灼不另收費，其他煮法可向職員查詢

位於新蒲崗嘅蝦立方都有4000平方呎同兩個釣蝦池，釣上嚟嘅蝦可以免費鹽燒、白灼，或者加錢揀其他煮法，特別推介香噴噴嘅奶油蝦。另外香港虾研會社有唔少會員都話職員唔藏私、會親自傳授技巧，老闆更上過viu TV嘅《玩X爆香港地》教授釣蝦技法啊。

釣蝦收費：1小時$140，2小時$260，3小時$360，4小時$440，後續每小時$100

蝦處理方法：現場烹調鹽燒或白灼免加工費，奶油蝦、胡椒蝦、甜酸蝦、黃金蝦、檸檬蝦加工費為$50/斤

石門呢間釣蝦場佔地約2500平方呎，有一大一細兩個釣蝦池，勝在雖然係室內但有落地大玻璃窗，採光度高加上黃色為主嘅裝修，好啱家長帶小朋友嚟體驗下釣蝦。有職員教大家點用釣具同蝦餌，每個鐘都會添加新鮮蝦。另有私人派對同包場服務。

釣蝦收費：1小時$140，2小時$250，3小時$350，後續每小時$100

蝦處理方法：直接取走，或交由職員現場鹽燒或白灼，免加工費

你無睇錯，大部分釣蝦場都係釣蝦，但觀塘呢間室內釣蝦埸嘅老闆就曾經喺池裡面放埋龍蝦同大閘蟹！當然要釣龍蝦同大閘蟹比釣蝦更難，而且唔係日日都有，要睇大家運氣啦。關注組組員都大力稱讚老闆同職員好友善，而且老闆廚藝一流，所以長期都有熟客捧場。

釣蝦收費：1小時$130，2小時$250，3小時$360，後續每小時$100

蝦處理方法：直接取走，或交由職員現場烹調，煮法及收費可向職員查詢

觀塘呢間釣蝦場佔地約4000平方呎，有兩個釣蝦池。每個鐘都會加新鮮蝦，當中更可能有彩帶蝦，即係蝦尾掛上彩絲帶嘅蝦，唔同顏色代表唔同獎賞，由免費飲品到三小時釣蝦半價卷都有！職員會協助新手，萬一唔好彩真係釣唔到，保底都會每人包返五至六隻蝦㗎。

釣蝦收費：1小時$140，2小時$240，3小時$330，4小時$400，後續每小時$100

蝦處理方法：可於自助燒蝦區由職員協助燒烤，可選鹽焗或蒸煮，費用全免

如果係第一次釣蝦，不妨參考下HalloLand釣蝦場分享嘅釣蝦小貼士：

1. 鈎餌方法：從蝦米剝去頭部及尾部，只留身體部分，用蝦鈎從中間穿過即可

2. 食餌訊號：當浮標被蝦拉下去呈下沉狀態，請稍作等待直到浮標穩定沉在水裡面，沒有浮上來，這時蝦很大機會已經將餌及蝦鈎吃到嘴裡面

3. 抽竿方法：提起蝦竿並保持水平，竿尖對準浮標頂部，用手腕使力往上發勁，利用蝦竿的彈性瞬間把蝦鈎打中蝦，此時不要心急起蝦

4. 抽竿貼士：如遇蝦掙扎，拿著蝦竿保持不動就可，讓蝦竿幫手卸掉蝦的力量，等待蝦無力的時候再將蝦拉出水面

5. 拿竿正確方法：切勿用手扶握中間竿身，這會使柔軟竿身失去卸力作用，並同時折斷造成跑蝦斷竿雙重損失

文：Cathy.H