香港人鐘意食日本菜是常識吧，最近銅鑼灣除咗有FLIPPER'S「奇蹟之班戟」之外，仲多咗間以釜飯同磯燒做主打嘅日本料理餐廳即將開業。最吸引嘅係門口旁邊有個開放式廚房，睇住師傅即席煮香噴噴釜飯，未食先流口水！
 

岩鹽日本餐廳主打嘅日本傳統釜飯，同香港嘅煲仔飯其實有異曲同工之妙。不過餐廳今次特別從日本訂造呢部釜飯機，唔單止可以同時煮到十份釜飯，而且有助控制同穩定火候，縮短煮飯時間之餘又令飯粒依然吸收得到上湯同配料嘅精華。
 

餐廳對食材亦相當講究，選用日本秋田米，浸泡一個鐘後先隔水，再加入日本木魚上湯燜煮。部分配料例如冬菇、雞肉會同時放入，而其他食材例如海鮮同牛肉會分階段放入燜煮，確保釜飯味道係最香同最鮮。
 

暫時餐廳會供應八款釜飯，想食到海鮮真味嘅首推北海道海鮮釜飯同廣島蠔釜飯，另外仲有海膽三文魚釜飯、燒鵝肝牛小排釜飯同蒲燒鰻魚釜飯等選擇。
 

餐廳另一主打係海鮮磯燒，最能夠品嘗到海鮮嘅原汁原味。值得一提嘅係大部分海鮮都係係由日本築地市場空運到港，放到爐面慢燒同樣香氣誘人。活日本響螺同味噌甲羅燒都係餐廳推介。
 

除咗釜飯同磯燒，餐廳仲供應各款日式料理，包括季節刺身、壽司、串燒同天婦羅等等。7月20號正式開幕之後，去銅鑼灣開飯又多個選擇喇。
 

岩鹽日本料理
地址：銅鑼灣波斯富街99號利舞臺廣場16樓A舖
開幕日期：2017年7月20日

文、相：Cathy