咁多位牛魔王，一定有留意到早前銅鑼灣連開兩間日山和牛店，一間主打火鍋，一間主打燒肉，嚟到第三間，係行chill嘅路線，配襯日本松本酒而推出咗個下午茶set同埋和牛小食set！

先講下個下午茶套餐，鹹甜點都有，仲要有仙氣！

綠茶茉莉花雪糕以朱古力包住，一嚟冇咁易溶，二嚟多重口感，甜得嚟又有淡淡茉莉花嘅清香。甜魔飛佛嘅仲有榛子閃電泡芙，香甜不膩。但想話清一清新返呢，檸檬撻就幫到手。

鹹點方面，有日山A5和牛蕃薯餅、鮮蝦多士同蟹肉脆餅，脆口嘢幾時都咁吸引。

另一款推介嘅係小食拼盤，唔好睇少佢，食晒呢九宮格，配多杯mocktail，細食嘅女生可能已經會飽咗。

呢個set將日山和牛以唔同形態呈現出嚟，最正嘅一定係日山A5和牛壽司同日山A5和牛迷你漢堡！後者塊和牛堡混合咗四種日山和牛嘅部位去製作，仲要用返本身嘅肉汁去煎，勁juicy，同埋口感好滑啊，有別於平時食開嘅漢堡扒。

日山A5和牛芝士春卷趁熱食仲可以有微微拉絲，芝士同牛肉一啖享受晒，另外仲有日山A5和牛牛肋條，以自家製嘅燒肉汁，有柚子香滲出添呀。

其餘幾道食雖然冇和牛份，但同樣吸引仲好送得酒。比較特別嘅有脆炸鱔乾，魚肉鹹香脆口。櫻花蝦餅唔止中間嘅蝦膠使用櫻花蝦，就連面頭都有幾隻脆卜卜嘅櫻花蝦乾。

嚟到酒鬼嘅重點喇，餐廳由有230年歷史嘅松本酒造直接入貨，供應多款唔太常喺香港搵到嘅日本清酒。餐廳更特別使用呢啲清酒，調配咗幾杯相當有新鮮感嘅cocktails。

5款以松本酒為基底嘅cocktails分別叫「松」、「本」、「守」、「破」、「離」，有兩杯仲係暖飲嘅添。作為base嘅清酒「守破離」，比一般sake更甜身，米味清淡，相對適合做food pairing。

「本」係幾過癮，望落去好似杯啤酒，飲落又有啲茶香，面頭嘅奶泡帶有鹹香，仲好幼滑。原來係包含咗松本清酒、Gin酒同烏龍茶，至於層奶油芝士泡沫仲係自家製嘅嘅。

「守」就係以松本清酒做基底，加入茉莉花Gin酒、烈酒、玫瑰糖水同番茄製作。生蕃茄蓉經過自家打製，混入cocktails裡面時除咗帶出清新嘅感覺之外，仲有啖啖沙沙地嘅口感，配搭埋蕃茄乾、奇異果乾，係種新體驗。

暖飲嘅「離」則係松本清酒以外，再加入柚子同柑橘，飲落先酸後甜，好易入口，似飲緊柚子汁多啲，兼且有粒粒柚子肉食添！

餐廳新開業期間，每日5:30-7:30pm去嗌返杯酒精飲料或mocktail，都會即送一個日山 A5和牛迷你漢堡！

Sensu
地址：銅鑼灣謝斐道535號Tower 535 1樓

文、相、片：Kar