香港人有幾個老家，除咗日本、韓國，最近嘅一定要數到台北，一有一兩日假就已經夠飛過去Hea下。話明係Hea，都係Shopping，Sleeping同Dining啦，唔知點解去旅行個胃就自然好似搭飛機行李重量咁可以加大幾陪，由朝食到晚都得。之但係次次都淨係去搵啲新店，其實有冇諗過你老家都有好多開咗廿年以上嘅老店都好值得試呢？而且價格仲好相宜（最近仲做緊優惠添）。今次就同你哋介紹下真正嘅台灣本土味，等你了解多啲老家啦！
早餐：68歲新潮餅店 福利麵包
薩芙亞蒂馬卡龍 Photos by Openrice
開飯仔成日同大家發掘好多新麵包店，我呢個麵包控嚟到台灣一樣有發現。呢間麵包店睇落個鋪面咁新淨，而且又有勁得意嘅動物糖霜餅同大大個西式麵包，唔講唔知呢個品牌有68年歷史。
更估你唔到嘅係，你以為最出名嘅麵包一定係啲整色整水嘅配搭，原來必試嘅大蒜奶油法國麵包！平時我哋買到通常係齋法包，但呢度嘅法包中間塗咗好多自家製嘅大蒜奶油，大蒜係店主喺雲林嘅田地養植耕收，嚴格挑選。一日出爐五次，你可以揀連醬烘或烘後塗醬嘅包，我推介後者，包固然烘得香脆，而蒜香味更突出，牛油會處於本溶狀態，會多一份油香。聽講好多女仔可以一次食一條，好誇張喔！怕吃不完就可以買口袋裝！
另外，都可以試下Savoiardi，食落又唔似手指餅，但就係改良版馬卡龍，口感軟滑，重點係唔會好似馬卡龍咁甜，一口一個幾方便好味。
午餐：平民日菜－梅村日本料理
唔係淨係香港人，台灣人都好鍾意食日本菜。除咗好多日本連鎖品牌，都有好多本地人主理嘅，梅田就係呢類，開業近40年，鋪面好大，有兩層。呢度勝在款式夠多，由魚生到定食到關東煮到天婦羅等都一應俱全，價錢方面亦相對較平，好似呢個鯖魚定食，有前菜、沙律、雞肉蒸蛋、麵豉湯正價都係港幣六十幾蚊，包你食到好飽。鯖魚燒得甘香，帶有點點油份留喺口腔，加上鹽花提升味道，我會話佢都有按住台灣人嘅口味調整過，所以同香港食到嘅有少少分別，但亦好代表到當地平民日菜嘅水平，以呢個價錢呢種味道，CP值好唔錯呀！
最新優惠：鯖魚套餐一份 (價值NT$200)
下午茶：粉圓十八式－魏姐包心粉圓
老闆娘魏姐認真犀利，兒時阿媽成日帶佢食粉圓，廿幾年前婚後嫁去宜蘭後，因為思鄉就開始喺羅東夜市攞檔賣包心粉圓，越賣賣紅，仲開咗幾十間分店。包心粉圓同一般粉圓唔同就裡面包咗粒紅豆增加口感，魏姐試過五十幾種材料先決定放紅豆㗎！
包心粉圓配搭有好多種選擇，例如自家製高濃度豆花，豆味非常重，加上芝麻冰球，好豐富，豆花滑粉圓煙韌；另外可以加涼粉，感覺清涼。天氣入秋冬，可以試下熱食配桂圓銀耳同桂圓紫米粥，銀耳爽口，紫米亦稀渴適中，食完會好暖心同滋潤。值得一提嘅係，無論係紫米、豆花定粉圓，所有材料都有有機認證，不加化學元素，所以可以食得安心。亦由於全天然，老闆娘都話粉圓食嘅時候先加落冰品，原因係粉圓遇冷就變硬，大家記得留意呢一點喇。
晚飯：台式小炒王－儂來餐廳
儂來開業成三十年，而家由第二代傳人，人稱臺菜王子嘅黃景龍主理，龍師傅年紀輕輕已經喺亞洲攞好多獎，有睇台灣嘅煮食節目亦唔難見到佢。
如果你一班人嚟台灣就好適合嚟呢間餐廳，可以叫好多道小菜試多幾樣，每一味平至港幣四十幾蚊至七八十蚊都有，非常大眾化。先嚟一個帝王蟹和風沙律，帝王蟹腳都幾大隻，好易拆肉，蟹嘅鮮唔會畀麻醬嘅香蓋過；再嚟金沙排骨，炸香嘅排骨包住鹹蛋黃，好香口，食起嚟又唔會好油，偏鹹最啱送飯；之後整多碟提香豆腐，味道似紅燒豆腐，都係用醬油煮過，但唔係偏甜，反而加咗辣椒令佢偏辣，都幾惹味，又係白飯嘅好朋友。最後仲有蔥爆牛肉，牛肉嫰口，鑊氣唔錯。
最新優惠：蔥爆牛肉一份 (價值NT$180)
飯後：消膩果汁－快樂地水果吧
食咗成日個肚都漲晒，去旅行最怕就便秘，飯後不如去位於101嘅快樂地水果吧飲杯全天然鮮榨果汁通下腸胃。呢個品牌不經不覺成立超過30年，創辦人由賣生果起家，對於生果好熟悉，知道點樣配搭果汁先最好飲。
可以一試芭樂鳳梨汁，芭樂即係番石榴，味道清新，加上菠蘿嘅甜，非常解渴。金桔檸檬汁酸酸甜甜，足料開胃清滯。精力果汁有六種材料，包括鳳梨、檸檬、蘋果、葡萄、芹菜同紅蘿蔔，蔬果味好濃，但唔會好大陣草青味，Feel到飲咗好多維他命C。全部飲品都唔會過甜，主要係靠蔬果本身嘅甜，所以都好健康。飲完上101睇個夜景或者行夜市就Perfect池！
最新優惠：芭樂鳳梨汁一杯 (價值NT$90)
最後提提你，只要買指定華航嘅套裝行程，就可以免費得到優惠券，享用以上優惠喇。另外仲有好多其他老店，喺年底前去食都一樣有優惠呀！
順手介紹下,開飯仔今次去台灣入住咗捷絲旅臺大尊賢館，非常之有驚喜，房間相當闊落，佈置簡單得來又有風格，最正係張床，兩個人都未必瞓得晒，真心舒服唔錯，佢哋喺台北有三間分店，位置都好近捷運站，大家下次可以考慮一下，價錢約港幣$600-$700一晚。