繼上次介紹完南丫島美食，今次到出名多嘢食嘅長洲篇！開飯仔精選咗5間特色餐廳畀大家，假期去玩時不妨試吓。

蛋主題專門店 是蛋

圖：joyceclt

長洲除咗大魚蛋出名，呢間以蛋料理為主題嘅餐廳都好有人氣，皆因佢全部菜式都好獨特呀。必食呢款松露是蛋炒配煎薯餅，煎薯餅非常香脆，薯絲嘅存在感好強，幾有口感，薯餅本身已經有淡淡黑松露香，加埋松露炒蛋真係好濃郁。土製炸蛋即係炸豬柳包住雞蛋，切開後嘅蛋黃仍然流心，水準之作。甜品當然要食埋焦糖燉蛋，面層焦糖香脆，燉蛋香濃微甜，值得一試。

蜆肉芫荽餃+腐竹薏米沙冰 餃子冰室

圖：estherltt

主打特色餃子，仲有好多大家聽都未聽過嘅口味！蜆肉芫荽餃令人驚喜，平時芫荽多數配豬肉，而家配蜆肉仔有鮮味得嚟更加有咬口。鹹蛋黃黃金餃一入口充滿肉汁，又食到鹹蛋沙沙嘅口感，不過因為鹹蛋關係比較易膩，同朋友share就最啱。黑白土匪餃真係好似食緊土匪雞翼咁，好香口。另有五香芋頭臘腸餃、獨創南乳豆卜餃同惹味咖喱薯仔餃等。另外佢哋仲有幾款好港式味道嘅沙冰供應，如腐竹洋薏米沙冰同竹蔗茅根甘荀沙冰等。

日式和風小店 伴日

圖：foodiepiggyy

裝修以木系為主嘅日式cafe，環境好舒適，啱晒去relax～食物方面主打日式定食同丼飯，定食包括前菜、燒飯糰、主食、昆布湯同飲品。主食之中，吉列芝士豚肉同豚角煮都唔錯，前者香脆惹味；後者蘿蔔夠腍夠入味，豚肉肥瘦適中。而飯糰都有好多口味，如原味、明太子、醬燒牛肉、泡菜牛肉等，飯糰餡料好足，底部仲有香脆嘅飯焦，好出色！

長洲必食All Day Breakfast no.11

圖：sukiyi126

呢間餐廳朝早係Cafe，夜晚係酒吧，設有室外座位，食物以西式為主。佢哋嘅All Day Breakfast好睇又好食，有煙肉、香腸、炒蛋、大啡菇、羅勒醬焗番茄、焗豆、牛角包同沙律，超豐富，同埋食得出每一款食物都係用心製作！牛油果醬蟹肉焗薯係另一人氣之選，焗薯配上牛油果醬同鮮蟹肉，入口更加fresh～

超打卡able咖啡店 三：三

圖：rachelchanhm

充滿人情味嘅簡約小店，主打多款超啱相機食先嘅特飲同埋吐司。好似紫薯芋泥肉鬆吐司同合盛紫芋吐司，前者紫薯、芋泥配肉鬆呢個組合真係冇得輸；後者加埋粒粒珍珠更有口感。飲品方面款款都好靚，啡蝶仙子係炸紅豆煎堆、雲呢拿雪糕配特濃咖啡，煎堆新鮮炸起好脆好香口，入面嘅紅豆綿密，加埋雲呢拿雪糕同特濃咖啡可一解甜膩感。

2024週末食盡離島！
大澳篇：（按此）
南丫島篇：（按此） 
大嶼山篇：（按此） 

文：Yanica
編：Cathy