台灣品牌KiKi嘅拌麵，大家應該都唔會陌生，咁KiKi茶呢？係佢哋最近新推嘅台灣天然茶飲嚟，金鐘有間新店將佢引入過嚟香港，而且仲自家研發咗三款特式味道嘅珍珠，連川辣珍珠都有！今次真係要問句：辣辣珍珠邊個飲啦！

KiKi茶嚴選嚟自台灣嘅茶葉、黑糖同蔗糖，仲特地訂購咗部美國嘅真空萃取泡茶機，將茶葉抽真空，令到茶葉中嘅精華得以保留，回甘香而冇咗陣茶澀味。其中招牌金鑽鳳梨青茶就係用呢部機所製，茶味係幾清香嘅。

另外嘅堅果奶蓋KiKi烤茶就啱晒甜魔啦，面層有果仁之外，仲有焦糖醬，係甜啊哈利！

至於自家製嘅珍珠就有三款口味，包括川味、夏枯草味同芋頭味，後面嗰兩款味，就咁咬的確係幾突出，至於川味，係用KiKi本身嘅椒麻粉去製作。佢哋杯雪絨川味珍珠冬瓜茶，川味珍珠咬落固之然有啲辣粉散出，但辣度好微，係條脷會有少少麻囉。成杯嘢嘅面層都有啲辣粉嘅，第一啖試落係幾新奇得意嘅感覺，不過飲多兩啖習慣咗就唔會覺得辣啦，可惜冬瓜茶味略淡。餐廳茶飲多達十幾款，堂食外賣都得。

至於嘢食方面，就以亞洲菜式——粥粉麵飯同素食餐為主。食得辣嘅朋友仔梗係要揀川味擔擔麵啦，用KiKi麵製作，加上辣醬肉係辣得幾過癮，直情好似會噴火咁。

要飽肚呢就揀鰻魚釜飯啦，鍋底仲有飯焦，都幾香口。

呢度仲有唔少特色腸粉，好似蠔仔腸粉同櫻花蝦蟹肉撈腸粉呀咁。即叫即做嘅，不過同大家平時食開同認知嘅腸粉有啲唔同，佢哋嘅餡唔係用腸粉包住嘅，而係喺蓋面，所以上碟時都會見到好多櫻花蝦同蟹肉啊，令到本嚟平平der點心美食，即刻升格咗咁（當然佢個價錢都係跟住升格啦科科）。

茶米
地址：金鐘金鐘道88號太古廣場1樓112號舖

文、相、片：Kar