呢間藍色咖啡店最近推出咗令女生們瘋狂嘅梳乎厘班戟，有得食梳乎厘班戟已經開心架啦，仲要係獨角獸主題？實在受不了，開飯仔一於去試味過下口癮！

剛推出約兩個星期嘅獨角獸梳乎厘班戟($168)，做法同一般梳乎厘班戟一樣，但呢度嘅班戟好大件，一份仲有兩件添，兩個人食都應該好飽！

兩塊厚厚嘅班戟上面有個3色忌廉山，啱晒一班忌廉迷，仲有朱古力珍珠、星星糖果，好有童真。

班戟雖然好厚身，但依然鬆軟。除咗食到香甜忌廉味，班戟亦有淡淡嘅蛋味。

每份班戟都會跟送一球指定口味雪糕，柯打幻彩梳乎厘班戟就有藍色呍呢嗱味雪糕一球！

至於另一款草莓天使梳乎厘班戟($118)，雖然無浮跨忌廉山，但就有口感清新嘅草莓、藍莓伴食，減輕甜膩感。跟送草莓味雪糕一球。

注意，梳乎厘班戟只限中環店及荔枝角店供應，並限指定時段。

供應分店：中環、荔枝角
供應時間：（中環）逢星期一至五12nn-9pm、（荔枝角）逢星期六及日12nn-9pm
注：另設加一；製作需時，下單時請向店員查詢

同場加映：倒插雪糕丹麥吐司

餐廳最近亦新出兩款同樣咁eye-catching嘅丹麥吐司。色彩較為鮮艷啲嘅Vicky’s Surprise($128)，除咗有酥脆嘅丹麥吐司，仲有藍色呍呢嗱及士多啤梨雪糕、倒插雪糕筒、彩色脆片及黑白朱古力脆脆。

另一款Nicola Delight($128)就好啱朱古力迷啦，除咗有朱古力及牛奶雪糕之外，另有oreo、彩針及朱古力醬。

Holly Brown
地址：中環士丹利街22號地下

Holly Brown
地址：荔枝角長順街15號D2 Place二期地下1號舖

文：Joy