姆明Fans係咪仲因為之前嘅主題Cafe結業而覺得可惜？姆明同佢嘅朋友家人最近去咗呢間日式麵包店啦！A-1 Bakery 同 Moomin Bakery & Café 首度聯乘，帶嚟四款主題麵包同精品，Fans要把握機會集郵呀。
 

姆明吉士包（$22/個）

亞美紅豆包（$22/個）

姆明同亞美分別變身唔同口味嘅造型麵包！兩款都用咗日本秋田縣米粉，唔單止口感更細密，白色嘅賣相靈感亦係來自白雪紛飛嘅北歐。姆明包裡面係香滑嘅吉士，亞美包裡面就係品牌自家製紅豆餡。
 

樹精朱古力包（$20/個）

長身嘅樹精就變成層層朱古力相間嘅朱古力包，口感豐富甜度適中，係無論大朋友定小朋友都會鍾意嘅口味。
 

樹精丹麥棒（$18/條）

另外每日新鮮焗製嘅丹麥棒亦加上樹精包裝，雖然麵包就無特別造型，但勝在口感香脆。
 

姆明煙肉生菜蕃茄三文治（$38/個）

可愛Light Meal之選，BLT、即係煙肉、生菜、蕃茄係簡單而不敗嘅經典組合，配搭自家調配芥末蛋黃醬同姆明麵包，色香味俱全。
 

肉醬肉丸意粉（$52/盒）

另一款輕食，姆明造型意粉上面係用番茄肉醬，惹味醒胃。加上粒粒肉丸更滿足！Fans更可以買走姆明家族意大利粉（$50/包）自己煮。
 

買三款或以上姆明系列產品，仲可以免費獲得手指偶一個！唔同分店有唔同人物，等緊大家去帶埋佢地返屋企呀！

文、相、片：Cathy