講到Omakase日式嘅就聽得多，西式Omakase又食過未呢？觀塘最近新開一間樓上西餐廳，推介呢個二人廚師發辦套餐，由前菜到甜品都由主廚一手包辦，每人$480起就可以食足八道菜，唔洗自己諗又食到最時令食材，抵啊！
餐廳佔地6000呎，裝修都幾有睇頭，有一間以少女心作主打嘅粉紅色主題房，仲設有戶外座位。
二人廚師發辦套餐會因應食材而有變更，部分菜式會不同。沙律、前菜如香煎鵝肝配無花果及湯都係一人會有一份。
1）生蠔
同樣會選用最時令生蠔，呢侵France Devine蠔味較重，入口偏濃；而愛爾蘭呢款Carlingford就鹹味適中。
2）刺身拼盤
雖然係西餐但餐廳都有供應日式刺身～所有刺身都好新鮮，如加拿大海膽、油甘魚、深海池魚及日本甜蝦。
3）風乾火腿沙律
4）香煎鵝肝配無花果
鵝肝用返傳統法式煮法，無添加任何調味料，食返鵝肝嘅原味。配上酸甜嘅澳洲無花果一齊食，中和鵝肝油膩感。連埋蕃茄乾牛油多士口感就更豐富啦。
5）龍蝦湯
龍蝦湯加入銀雪魚骨熬製，味道更鮮甜濃郁。
6）安格斯牛柳
選用美國黑安格斯牛柳，牛味較肉而且有咬口，點埋意大利陳醋食又幾夾。
7）黑松露意粉
黑松露控唔可以錯過呢個意粉，有三種唔同品種菇類，分別係羅馬啡磨菇、雞脾菇及本菇，再加入意大利5%黑松露，啖啖都係香濃黑松露味啊。
8）甜品 coffee or tea
今次呢個甜品就係拿破崙蛋糕，酥皮做得香脆，甜度啱啱好。
地址: 觀塘巧明街107號國基集團中心4樓1號舖
文: Yanica
相、片: Tom Li