蟹季又到啦，每逢當造嘅蟹都會特別肥美鮮甜！今期搵咗幾間以蟹為主題嘅自助餐畀大家，蟹迷一定可以食到捧住個肚走～

「滋味蟹饌 探索海洋風味」自助盛宴 港畔餐廳

自助午餐同晚餐期間有一系列蟹菜式輪流登場，必試推介包括凍蜘蛛蟹，鮮味十足，蟹肉嫩滑，令人一試難忘。港式蟹肉臘味飯係傳統同創意嘅完美結合，臘腸嘅鹹香同蟹肉嘅鮮甜平衡得好好，每一粒飯都充分吸收咗蟹汁同臘味嘅油香，粒粒分明。仲有花雕蟹肉雞油蒸蛋白、墨魚蟹肉油炸鬼配香辣醬，以及金菇蟹黃醬配日本稻庭烏冬香煎鴨肝，每一款都可以滿足你嘅味蕾！

供應時間: 即日起至2024年11月30日

頂級蟹宴自助晚餐 JW咖啡室  

以各地優質鮮蟹入饌，炮製一系列以蟹為主題嘅菜式～首先提供多款冰鎮鮮蟹，包括英國麵包蟹、亞洲紅蟹同加拿大鱈場蟹腳，每一款都鮮甜無比。熱葷菜式同樣令人期待！泰式咖喱炒蟹帶有濃郁嘅椰香同香辣嘅咖喱味；焗釀蟹蓋就將蟹肉同調味料烤至金黃，香氣撲鼻。中式就有呢味花雕雞油蒸蟹、蟹粉小籠包同秘製蟹粥，蟹粥粘稠鮮甜，食落去有陣陣蟹肉香氣。除咗蟹宴美食仲有其他新鮮海產，絕對滿足每一位海鮮愛好者。

供應時間: 即日起至2024年10月31日

「鮮蟹」主題自助餐 cafe TOO  

呢個自助餐可以試勻唔同蟹種，如大閘蟹、花咲蟹、斯里蘭卡蟹同本地蟹皇，絕對滿足你對螃蟹嘅慾望。每週末先供應嘅北海道花咲蟹飽滿多汁，松葉蟹膏蟹肉沙律亦係開胃之選，分量十足嘅蟹肉混合濃郁嘅蟹膏，鮮味濃厚。銅盆糯米蒸花蟹都好特別，選用頂級糯米、瑤柱同蝦米，連埋上等斯里蘭卡肉蟹一齊蒸，蟹肉嘅香味完全融入咗糯米之中，每一啖都充滿蟹肉嘅鮮甜同米飯嘅軟糯。除咗螃蟹佳餚之外，自助餐仲有一系列烤肉、炸物同各款地道小菜任你選擇，配埋甜品真係食到超滿足～

供應時間: 即日起至2024年11月27日

「味遊 · 杭州」自助餐 The Farmhouse咖啡廳  

以「味遊 · 杭州」為主題嘅自助晚餐，聯手杭州著名星級餐廳「湖濱28中餐廳」共同打造。杭州菜以清淡細膩見稱，強調食材新鮮同烹飪技術，自助餐亮點包括滋味濃郁嘅西湖牛肉羹、十年花雕熟醉大閘蟹（晚餐供應）、軟糯入味嘅鎮江餚肉同清新爽口嘅西湖藕韻，令你一嚐經典江南風味。另有二十年花雕酒蒸遠海梭子蟹𠻹～

供應時間: 即日起至2024年11月30日

蟹逅蠔饗‧海鮮自助晚餐 City Café  

多款蟹同生蠔嘅海鮮盛宴！推介菜式包括鮮甜美味嘅西班牙魚子醬配北海道紅楚蟹伴溫泉蛋、開胃嘅泰汁甜蝦剌身、鮮嫩多汁嘅三色焗生蠔、滑溜細緻嘅法式蟹皇燉蛋白、香脆可口嘅潮式迷你鮮蠔仔餅，以及香味四溢嘅橋底炒金蒜龍蝦鉗。仲有源源不絕供應嘅空運生蠔、凍蝦、布朗蟹、北海道紅楚蟹腳、藍青口、鮮蜆同埋各款日式刺身等，海鮮控一定要嚟試！

供應時間: 即日至2024年10月31日

文：Yanica
編：Cathy