人生若只如初見。疫情下，荃灣小店「初見」保留初遇初識嘅純粹，不計報酬地幫得就幫。召集義工隊上樓為有需要家庭採購物資、送飯畀老人家，甚至電腦都整埋。店家坦蕩蕩表示：「我哋未必可以共富貴，但一定可以共患難」，型得嚟又有啲感動。

義工去街市買餸畀有需要家庭。
圖：初見Facebook

「初見義工隊」早前知道有兩母女確診，已經一星期居家隔離無出街。但遲遲未等到相關部門物資，於是就幫手買咗兩大袋食物、牛奶掛於家門外。店家提到：「今時今日呢個環境只能夠盡做。身為香港人，我哋係十分之有愛。」並補充：「希望大家明白，我哋資源有限，我哋真係好希望幫到有需要嘅人。」

確診家庭需要物資支援。小朋友話想飲奶，義工貼心買埋牛奶。
圖：初見Facebook

另外，亦有媽媽要獨力照顧3位小朋友，生活壓力可想而知。義工隊出動買齊煮餸食材，等媽媽輕鬆煮餐好飯畀小朋友。當受惠者問：「我點樣畀返錢你？」，義工暖心回應：「我都無計到，香港人一點心意吧！」

店家提到義工隊係自發性質，如果你都想幫香港人，可以同佢哋聯絡㗎。有你有我，一齊盡做啦。

義工送上物資後收到媽媽靚餸回圖，好窩心。
圖：初見Facebook

荃灣「初見」主打成價比高石燒牛，招牌香草吉列牛係必食！牛扒外層輕輕炸過並沾滿香草，食客先用牛脂塗勻熱辣辣石板，再放上牛肉燒至合適熟度，食落外酥內嫩勁有肉味。同場仲有板燒雪花牛、鍋物同刺身等日本料理。

圖：雪梨茶319

初見
地址: 荃灣海壩街22號華達樓地下F號舖

文：KateLuk