來自美國洛杉磯比華利山嘅Sugarfina，被譽為10大美糖果店，招牌玫瑰香檳小熊軟糖，曾創下18,000人waiting list紀錄，深受明星名人熱捧！今年7月進駐香港，將店內招牌糖果帶來香港，更全球首度推出香港限定嘅雪糕及飲品，美國本店都冇得賣！
雪糕同飲品以舖頭糖果為設計靈感，容器同紙杯都係度身訂造，賣相好靚！玫瑰香檳軟雪糕（$48）源自著名熊仔糖，軟雪糕加入少量葡萄酒製作，玫瑰花香好突出配上少少酒味，加埋以Dom Perignon年份香檳製成嘅熊仔糖同金箔，martini glass嘅高腳杯好優雅！
凍飲有兩款，以雞尾酒調酒器膠杯盛載，造型好得意，膠製好實淨，可以循環再用。粉紅西柚氣泡特飲（$46）依照粉紅鶴造型嘅軟糖製成，新鮮西柚酸甜富果香，飲落似西柚汽水，粉紅色調搶眼，好適合咁熱嘅天氣飲用。
另一款荔枝薄荷氣泡特飲（$46）取材自mojito，以荔枝肉、新鮮薄荷葉同有氣水調成，味道少甜清新，配返粒Sugarfina嘅Mint Chip Milkshake薄荷朱古力就好夾。
熱飲同樣有兩款，紙套上面嘅花係人手逐個製作，呼應舖頭嘅花花牆，靚到唔捨得掉！竹炭爆谷拿鐵（$43）冇咖啡成份，以活性炭牛奶加忌廉製成，黑色拉花幾有型。飲落有微微爆谷香甜味，為舖頭皇牌產品黑朱啤力海鹽爆谷嘅延伸。
另一款蜜糖檸檬拿鐵（$43），就以幼滑奶泡配以蜜糖及新鮮檸檬，味道如檸蜜般，秋風起飲就最舒服。
地址：尖沙咀廣東道3-27號海港城港威商場3樓3327號舖
文、相、片：Perrins