香港有唔少外食一族普遍都食得唔太健康，最近紅磡就新開一間以近年好興嘅「瘦身恩物」椰菜花飯作主打嘅健康餐廳。餐廳以「似飯非飯，以花作飯，健康不捱餓，低醣飲食新文化」為理念，店主Jacqueline話自己有時大魚大肉咗幾日，之後就會食返低醣飲食平衡吓，更希望將低醣飲食文化帶畀大家。
餐廳選擇貴精不貴多，分別有四款椰菜花飯及兩個藜麥菜式。但其實飯底唔係淨係椰菜花咁簡單，店主怕只有椰菜花會太單調，所以加入藜麥及杏鮑菇做飯底，口感豐富之餘色彩更豐富。
咖喱香煎午餐肉太陽蛋($58)
咖喱香煎午餐肉太陽蛋飯，咖喱醬係自家調製，甜甜地餘韻會感到少少辣味，雖然加上邪惡嘅午餐肉，上層邪惡下層健康叫做平衡返。
咖喱炸豬扒(無激素) ($68)
肉類方面，店主都會盡量揀返啲無激素肉類。好似咖喱炸豬扒就使用西班牙無激素豬扒，使用氣炸鍋不加油製成，口感香脆結實。
滑蛋雞(無激素) ($68)
高蛋白質之選，選用無激素泰國雞，加入洋蔥及滑蛋，口感嫩滑。
和風溫泉玉子牛肉($68)
選用較高等級嘅美國牛肉，脂肪少啲相對就健康啲，甜甜地嘅醬汁配上流心溫泉蛋，好吸引。
五目炒野菜太陽蛋咖喱藜麥($78)
呢款係連素食者都可以食，因為好多時出面啲咖喱都會加雞湯去煮，而呢度就用昆布湯、菇及洋蔥製作，咖喱配上新鮮帶甜嘅時令野菜，味道比想像中惹味，而且口感都好豐富。藜麥就算用南美州三色藜麥，顏色及味道上都更優質。
地址: 紅磡馬頭圍道88號海青閣地下C號舖
文、相、片: Yanica