25/1 更新！

繼McCafe嘅4款飲品、甜品，今日起，麥當勞推出Bourbon聯乘甜品系列第二彈──賣相都幾eye-catching咁喎，開飯仔即刻去咗試食啦，快速睇相先！

最吸引嘅，一定係呢個士多啤梨味新地窩夫筒($10)，新地可選士多啤梨味或者扭紋，香甜嘅士多啤梨新地上面，仲有一塊口感鬆脆嘅Bourbon士多啤梨夾心餅，內裏仲有薄薄一層士多啤梨醬。

不過最eye-catching嘅都係粉紅色嘅新地筒，除咗視覺一流，仲聞到少少士多啤梨嘅香味添！另有士多啤梨味新地筒($5)。

至於麥旋風迷可以食呢個非常多料嘅士多啤梨味麥旋風($14)，以OREO麥旋風做base，加入士多啤梨醬以及幾塊迷你朱古力曲奇，令整杯麥旋風口感好豐富！

而雙重士多啤梨味新地($9)，驟眼睇落同普通版士多啤梨新地差不多，其實呢杯新地所用嘅士多啤梨醬，同普通版嘅唔同架，而且果醬、花生嘅分量亦較多，食到不少士多啤梨果肉以及脆卜卜花生碎，食落好有口感。

文：Joy

=====================================

11/1 更新！

冬季就係食士多啤梨嘅最佳季節，麥當勞亦特別搵嚟日本人氣士多啤梨威化條嘅Bourbon品牌合作，今日起陸續喺McCafé及甜品站推出限定飲品、甜品，令麥當勞都變得粉紅！

麥當勞XBourbon嘅聯乘系列分為兩部分，打響頭炮嘅有今日開售嘅McCafé 4款飲品、甜品。呢杯士多啤梨白朱古力X Bourbon，白朱古力奶淋上士多啤梨醬，香甜奶滑，奶泡仲好綿密添！

再跟送一包Bourbon Elise士多啤梨忌廉威化條，用威化條沾少許忌廉再食，更加滋味。

另有凍飲version，上面有一層厚厚忌廉同埋士多啤梨醬，賣相好pink，最啱影相。

咖啡迷就可以試飲士多啤梨白朱古力咖啡X Bourbon，喺latte中加入士多啤梨醬、白朱古力奶，咖啡味道減輕士多啤梨嘅香甜，令味道更加balance，好有層次感。

甜品方面有士多啤梨蛋糕層層疊，以海綿蛋糕做底，中間有由士多啤梨果肉及mousse做成嘅千層蛋糕，面層就有白朱古力碎及忌廉，賣相好靚。

味道方面，士多啤梨果肉帶點微酸，好fresh，同忌廉好夾，食落亦不太感膩。中間嘅班戟皮薄，mousse又多又鬆軟，好味！

1月25日起供應嘅Bourbon曲奇士多啤梨味新地窩夫、雜莓士多啤梨味新地窩夫，喺帶點焦脆嘅焦糖窩夫上面加上士多啤梨味新地，再灑上bourbon迷你碎朱古力曲奇同埋OREO碎，或者酸酸甜甜嘅雜莓醬，做tea time snack就啱晒！只限金鐘海富中心、海灣街、太古城中心及又一城cafe店供應。

文：Joy