今年新開嘅Cafe真係數都數唔完，但當中以天然健康為主題嘅就唔多。尖沙咀呢間新店前身係紐西蘭天然健康產品零售店，日前搬舖後開埋Lifestyle Cafe！除咗可以品嘗一系列用紐西蘭健康食材入饌嘅美食之外，落地大玻璃窗外嘅樹景都好加分，的確好有大自然Feel感覺好舒服呀。
 

Naturally Choice Cafe位於尖沙咀彌敦道及山林道交界，窗外係九龍公園嘅樹景。Menu選擇多元化，唔少都用咗紐西蘭健康食材，部分仲係素食或無麩質，照顧有唔同飲食需要嘅朋友。
 

英式早餐（$118連一杯果汁）

All-day-brreakfast唔單止睇起嚟好豐富，當中嘅食材例如有機雞蛋、雞肉腸、果汁、沙律上面嘅牛油果油都係選用紐西蘭出品。加上三文魚、煙肉、大啡菇、焗茄汁豆同牛角包。整體水準唔錯，特別係炒蛋口感好滑溜。
 

紐西蘭傳統肉批（$68）

鹹嘅肉批大家應該食得多，但正宗紐西蘭牛肉批香港暫時就未見有，佢哋就引入紐西蘭傳統品牌Dad’s Pies芝士牛肉同蘑菇雞肉兩款口味嘅批。開飯仔試嘅呢款係芝士牛肉，批皮酥脆而且厚薄適中，裡面係牛柳粒同半融芝士，牛肉嘅肉香、醬汁嘅鹹香同芝士嘅牛奶香夾埋好香口！
 

紐西蘭Cookie Time曲奇（$20/2pc）

Cookie Time係紐西蘭嘅國民曲奇品牌，絕無添加防腐劑或人工香料。食落口感特別鬆脆，而且完全唔黐牙。餐廳仲會幫你焗熱塊曲奇，牛油香更明顯之餘，半融朱古力味道亦更香甜，最啱配返杯熱咖啡慢慢嘆。
 

紐西蘭天然雪糕配朱古力心太軟（$58）

選用紐西蘭直送嘅New Zealand Natural雪糕，品牌主打不含人造色素及防腐劑、而且無添加糖，餐廳就揀咗酸酸甜甜嘅Summer Berries口味去配搭朱古力心太軟。朱古力心太軟用法國朱古力製作，外層微脆裡面係香濃嘅朱古力流心。一凍一熱口感相當討好，不過留意返雪糕比較易融，最好盡快食呀。
 

Super Ruby（$48）

用咗紐西蘭100%有機黑加侖子沖劑同紐西蘭pH7.5天然礦泉水沖調，前者含豐富花青素，係一種天然抗氧化劑，唔單止有助護眼，仲有效針對幽門螺旋菌！而後者係天然弱鹼礦泉水，含19種天然礦物質。飲落係帶果肉嘅沙冰口感，黑加侖子味道濃郁，酸甜清爽。
 

Matcha Latte ($48/Hot，$50/Ice)

採用紐西蘭品牌Thea嘅有機抹茶，茶甘突出，甜度適中，而且口感幼滑無粉粒。
 

Naturally Choice Cafe
地址：尖沙咀彌敦道176號4樓（入口在山林道）

文、相：Cathy