嚟緊唔少酒店餐廳都陸續推出秋季主題下午茶啦，一齊睇吓邊間啱你心水，快啲約埋朋友去啦！

品秋點敍下午茶 Alibi – Wine Dine Be Social  

由行政糕餅總廚Roy Ma聯同米芝蓮星級廚藝團隊精心打造嘅品秋點敍下午茶，可以嚟呢度品嚐一系列充滿秋日氣息嘅鹹甜美點。甜品以多款時令水果製作，首先登場嘅有巨峰提子茉莉茶奶凍，香甜巨峰提子同茉莉花茶完美結合，表面嘅巨峰提子泡沫令口感更加豐富。而追求濃郁口感嘅就唔可以錯過焦糖榛子蛋糕，入面包住香濃焦糖醬，堅果香氣撲鼻，令你一啖接一啖。鹹點推介呢個松露蟹肉多士，選用鮮美蟹肉同手刨松露片，味道層次豐富。下午茶仲包括兩杯無酒精雞尾酒，以西柚、蔓越莓汁同青檸調配而成，好清新呀～

供應時間: 2024年9月1日起至2024年11月30日，每日下午2時30分至5時30分

日式現代下午茶體驗 The Butterfly Room  

今次推出嘅下午茶融合日本同現代風味，味道清新加上精緻造型帶嚟與別不同嘅視覺享受。享用甜點前，會先上日本蜜瓜味噌雪糕芭菲、斑蘭忌廉配椰香曲米布甸等專為清洗味蕾而設嘅「前甜點」。接住最令人期待嘅部分，必定係從餐車中點選一系列招牌甜點，包括松露朱古力、蝴蝶酥同雲石瑪德蓮蛋糕等；仲有多款以日式食材同工藝為靈感嘅擺盤甜品，包括層層果肉嘅草莓捲蛋糕、芒果麻糬蛋糕同埋鬆脆嘅黑芝麻千層酥。另外手指三文治配迷你餐湯、新鮮出爐嘅經典鬆餅配自家製果醬同奶油忌廉都一樣配埋，款式好豐富！

供應時間: 即日起直至另行通知

秋韻果漾下午茶 香港嘉里酒店大堂茶座  

以多款秋季時令食材同水果入饌，包括無花果、香梨、肉桂、血橙等，精心製作出一系列果香四溢嘅鹹甜美點，每一款都造型精緻。冰涼水蜜桃特別揀咗日本岡山水蜜桃作開胃菜，清甜可口；鵝肝泡芙絕對係一大推介，鵝肝嘅濃郁同無花果嘅清甜巧妙結合，味蕾瞬間感受到秋天嘅味道。甜點方面亦非常出色，無花果撻以紅酒啫喱搭配奶油杏仁醬同無花果醬，濃郁嘅果香令人一試難忘；黑朱古力核桃蛋糕加入咗波本酒奶油忌廉，散發出淡淡嘅酒香。以精緻木盒盛載嘅下午茶都超啱打卡呀～

供應時間: 2024年9月1日至10月31日，星期一至五下午2時30分至5時30分；星期六、日及公眾假期首輪下午1時30分至4時，次輪下午4時15分至6時

POREfessional美肌下午茶 Cucina+馬哥孛羅香港酒店大堂酒廊  

呢間酒店聯同國際美妝品牌合作推出限時嘅POREfessional美肌下午茶，以佢哋嘅兩款新產品為設計靈感，精心製作咗各款鹹甜美點。鹹點有煙三文魚、金箔、魚子醬，再加上意式火腿同芝士慕絲，配以開心果，味道非常豐富，仲可以將黑松露粉末灑喺各式鹹點上增添層次。甜品就推介紅莓唇膏朱古力，呢款朱古力濃郁細膩，入口即溶；另有藍莓馬卡龍、粉紅意大利咖啡蛋糕同玫瑰芝士蛋糕，每一款都好精緻呀。

供應時間: 星期一至五下午3時至5時30分；星期六、日及公眾假期下午3時30分至5時30分

《綠野仙蹤》魔幻下午茶 香港麗晶酒店 大堂酒廊

以《綠野仙蹤》為題嘅魔幻世界迷人下午茶，有桃樂絲、稻草人、鐵皮人同膽小獅結陪你一邊嘆美食，一邊欣賞維多利亞港景致。茶點活現一眾受人喜愛嘅角色同故事情節，好似Lemon（檸檬）係向身穿藍色格仔連身裙、踏上黃磚路歷險嘅桃樂絲致敬，甜點上嘅糖漬檸檬以本地檸檬同新鮮薄荷製成，包裹喺白朱古力同柚子忌廉之中；向膽小獅致敬嘅Honey（蜜糖）海綿蛋糕，則採用本地得獎蜜糖同柑橘醬製成，仲有代表鐵皮人嘅Cacao（朱古力）、藍蟹配柚子、玉子配魚子醬等口味嘅手指三文治𠻹。你可選擇配搭以龍舌蘭、洋甘菊茶、熱情果糖漿同檸檬汁調配而成嘅清爽Yellow Brick Road（黃磚路）雞尾酒，以及混合雲呢拿博士茶、士多啤梨糖漿和檸檬汁嘅無酒精雞尾酒Tornado（龍捲風），提升成個下午茶層次。

供應時間: 即日起至10月13日，星期一至五下午3時至6時；星期六、日及公眾假期第一時段中午12時至下午3時，第二時段下午3時至6時

文: Yanica、Cathy