標榜可以生食，有「日本蛋王」之稱嘅蘭王蛋，賣到四、五十蚊一盒，更曾經一度賣斷巿。最近有人氣燒肉店聯乘蘭王蛋，推出幾款期間限定嘅生蛋料理，滿足一眾肉食獸同蛋控。

蘭王蛋出產自日本九州，生產嘅母雞200至320日大，以天然飼料，例如甘筍、蘿蔔葉等餵飼，既冇激素，亦冇添加劑同抗生素等。蛋黃較一般雞蛋色澤更鮮，呈鮮橙色，蛋漿挺身啲，蛋香味都濃郁啲。入口香港嘅蘭王蛋，有空運亦有船運，如果喺巿面上買嘅話，記得要見到包裝盒嘅右上角，有紅色飛機標誌，仲有標明賞味期（通常係一兩星期內）嘅先至可以生食㗎留意返。

而尖沙咀呢間人氣燒肉店，就聯乘蘭王空運版總代理，同埋第一次登陸香港嘅西澳洲黑毛和牛品牌 Margaret River Wagyu，推出4款午巿限定嘅蘭王蛋料理，晚巿亦有部分menu可以升級做蘭王蛋，蛋控們要去朝聖啦。

 牛板腱石鍋飯

Margaret River和牛以獨家調配飼料餵飼，肉味香濃。一片片牛板腱蓋滿晒成個鍋嘅牛板腱石鍋飯，加多隻生蘭王蛋同三文魚子，賣相唔花巧但吸引。篤穿蛋黃後，由得啲蛋漿慢慢滲入肉同飯中，份外治癒。燒過嘅薄切牛板腱好香口，雖然有少少筋，油香十足，肉質香嫩，沾埋蛋漿同鮮鹹香嘅三文魚子，層次更豐富。

 蘭王拌飯

蘭王拌飯則由牛肩胛肉粒同廣島蠔組成，牛肩胛肉質細嫩，撈埋蛋漿一齊口感更滑。

 蘭王和牛漢堡飯

混和日本A4和牛同美國牛肉，再加入紅蘿蔔碎嘅蘭王和牛漢堡飯，自家手打製成，膩度較低，拌以蘭王蛋專配豉油，仲多咗陣甜味添。

 蘭王生薑豚肉丼

唔配牛，配豬一樣冇問題。午巿限定嘅第4款選擇有蘭王生薑豚肉丼。

 牛魔野原燒

至於晚巿，點選牛魔野原燒，則可免費升級生蛋做蘭王蛋。嚟自日本空運嘅A4和牛，輕輕喺爐上一燒即可，點埋蛋漿，既有肉汁亦有蛋香，好juicy，口感軟滑。

牛魔  
地址: 尖沙咀棉登徑8號地下5-6號舖

文、相、片：Kar