日式拉麵一向都係港人至愛。最近喺灣仔利東街又有一間拉麵店進駐，主打博多風，呢間店巴閉之處在於佢成功邀得日本東京一間人氣拉麵老店嘅老闆做顧問，而且佢嘅價錢同區嚟講真係好抵食，平均六十至八十蚊就食到。但平還平，每款拉麵同小食都用心製作架。

特濃櫻花蝦蝦湯叉燒拉麵($88)

湯底用咗大量波士頓龍蝦頭、洋蔥、紅蘿蔔同西芹等蔬菜熬製5-6小時而成，蝦味真係又香又濃，而且因為加咗蔬菜，會有陣陣清甜嘅味道，仲有層次添。拉麵上都灑咗大量日本櫻花蝦，溫泉蛋使用日本廣島白蛋，呢種蛋比較容易控制流心程度。

秘製香蔥塩味叉燒拉麵($78)

呢款雞湯拉麵都係另一主打，雞湯用咗雞腳、雞殼、紅蘿蔔同白蘿蔔等蔬菜熬成，以清為主。叉燒先煮三小時再切塊火灸，迫哂啲油份出嚟，食嘅時候就唔會覺得好肥膩。另外餐廳連配菜都一絲不苟，炸蓮藕每日去買新鮮蓮藕，親自人手切薄片再炸，其他配菜如海帶同木耳都有預先調味。

迷你龍蝦湯海鮮泡飯($42)

龍蝦湯海鮮泡飯湯底係同蝦湯拉麵一樣，配有魷魚、蝦同蜆等海鮮，上枱果陣仲係滾緊，冬天食就最好啦～

自家製炸雞($42)(黑椒味$45)

炸雞個脆皮係用三隻粉溝出嚟，負責人話每隻粉都有各自嘅優點，好似有啲會令個皮薄啲，有啲就會脆啲咁，所以就用咗三隻粉，炸出嚟嘅雞就皮薄，夠脆同無咁油啦！味道方面就可以自己選配黑椒醬同沙律醬，沙律醬溝咗少少泰式醬，味道無咁單一；黑椒醬就溝咗少少沙律醬，味道就唔會太重啦。

炸芝士蝦球($42)、鮮蝦餃子($42)

芝士蝦球食果陣就要小心啲，因為一咬芝士真係會爆漿。餐廳就教路食鮮蝦餃子果陣，醬汁個比例係一份豉酒兩份醋，再加少少辣油就最好食啦！

Rakuraku 樂拉麵

地址: 灣仔皇后大道東200號利東街地下G30號舖

文、相、片：Yanica