近日各位Facebook都應該被呢間位於淺水灣嘅水晶屋餐廳瘋狂洗版，係咪好想book枱呢過聖誕？無敵大海景、水晶屋嘅私人空間、飄雪藤椅影相位，唔知食物質素又點呢？

水晶屋坐擁淺水灣180度無敵大海景，無論係觀賞日落時份，定係閃爍嘅夜空，好chill。

一入餐廳，就見到呢個指定影相位，有飄雪，仲有籐椅坐喺度，後面仲有一大片無遮擋嘅星空做背景，正！

枱上仲有聖誕裝飾，等嘢食嘅時候都唔會無聊。

餐廳菜式由觀塘工廈高質私房茶──在家嘅行政總廚Roni主理，菜式以海鮮fusion為主，有齊頭盤、湯、主菜及甜品4道菜。

先介紹各位最留意嘅主菜，呢款香辣炒海鮮盤以菲律賓肉蟹、越南虎蝦、花甲及番薯蜆4款時令海鮮，加上用10幾種香料製成嘅秘製香辣醬，鮮甜又惹味。底層嘅印尼撈麵盡吸蜆水鮮味，係一道好有東南亞口味嘅菜式。

採訪當日，當廚師烹調時，香料嘅味道好強勁，令在場嘅記者都飢腸轆轆。

而芝士龍蝦闊條麵，以大量龍蝦頭、蝦頭熬嘅海鮮汁去煮闊條麵，再加入車打芝士、mozarrella芝士混成嘅芝士汁，再將原隻美國波士頓龍蝦拆肉，喺龍蝦肉上面加上少許食用金箔片就完成。

用番龍蝦頭去擺盤裝飾，賣相更美觀。味道方面，龍蝦鮮甜兼彈牙，與芝士汁亦好夾。

香烤法國春雞炸配流心蛋，採用法國走地春雞，重量約400至500克，先醃後焗，令雞肉皮脆肉嫩。

最吸引就係流心蛋，切開嘅時候蛋汁徐徐地流出，極具視覺效果。

頭盤亦係心機之作，呢道海膽清酒鮑將南非鮑魚、清酒、醬汁、味醂一同燜煮，然後用日本大吟釀浸一晚，令鮑魚入味之餘仲充滿酒香添！再加埋加拿大海膽、三文魚子及炸紫蘇，非常出色。

法式油甘魚腩他他，油脂感重嘅日本油甘魚腩配以台灣柑桔、檸檬汁、橄欖油、粟米蓉、蔥等製作法式他他，味道微酸，好開胃。

將西班牙巨型八八爪魚以slow-cooked方法處理，再加入檸檬汁、橄欖油、自製龍蝦油，煮成呢道龍蝦油西班牙八爪魚。

閨蜜最啱食！水晶屋歎3層架下午茶

除咗晚餐，餐廳亦推出以聖誕為主題嘅3層架下午茶，一共有4款鹹點及6款甜點，包括：山核桃批、南瓜批、金巴利橙味鬆餅等，賣相精緻，味道不會過甜，最啱同閨蜜一邊影相，一邊享受小食。

Igloo
地址：淺水灣海灘道28號Sunset Beach Club
營業期至：2018年2月下旬
價錢：（下午茶）$388-$588/位、（晚餐）$988-$1,788/位
注：只限網上訂位，網站為http://igloo.tocktix.com

文：Joy