荃灣美食咁多，最近又有一間新派港式西餐加入戰團！餐廳主要供應港式西餐，充滿香港風味之外亦混合少許西式元素，將中式食材以西式方法烹調，新鮮感十足！而且食物選擇夠多價錢又親民，荃灣友又多個搵食去處喇！
餐廳走清新自然嘅設計風格，以原木桌椅配上鮮綠色木窗。
熔岩芝士焗厚豬扒飯($88)
唔淨止酒店Buffet，連呢度都有熱溶芝士live show睇！員工即場於焗厚豬扒飯上刮上熱溶芝士，保證芝士熱辣辣仲識拉絲～芝士結合巴馬臣及水牛芝士，味道香濃。另外豬扒夠晒厚身有肉味，食肉獸一定啱！
火焰干炒安格斯肥牛河($88)
除咗熱溶芝士live show，仲有火焰表演睇～干炒安格斯肥牛河都會即場火焰，河粉有鑊氣。牛肉選用安格斯肥牛，口感軟腍。
脆炸巨雞髀配黑松露蛋黃醬($52)
鍾意食炸雞髀嘅朋友留意，呢度雞髀係巨型炸髀嚟，皮脆多汁，配埋黑松露蛋黃醬又幾新鮮。
流心芝士西多士、流心紅豆西多士($45)
講到港式茶記美食代表又點少得西多士，西多士加入卡夫芝士，鹹鹹嘅芝士配上香甜嘅糖漿，反而無咁易膩！
櫻花蝦乾避風塘一口茄子($58)
至於呢個避風塘一口茄子，香濃惹味，加埋櫻花蝦乾就更香口～
地址: 荃灣眾安街68號荃灣千色匯I期2樓2032號舖
文: Yanica
相、片: Calvin Kwok