唔少人都鍾意去東南亞旅行，泰國曼谷就係其中一個熱門旅遊點，每日瘋狂Shopping、做massage、食好西是常識吧。開飯仔專誠搵咗泰國當地嘅同事為大家搜羅在地人最推介嘅美食！
如果你係一個咖啡愛好者，咁曼谷一定喺你嘅旅遊清單上﹗又如果你鍾意去環境優美嘅地方影靚相，po Instagram呃like嘅話，咁以下推薦嘅5間cafe就實啱晒你啦﹗
椰子蛋糕（75 baht）
行入曼谷嘅唐人街，走入去Baan 2459文物精品酒店裡面，就會搵到Chata Specialty Coffee啦﹗Chata分開兩部份，一部份係order嘢食嘅接待處，而另一部份就係仿溫室設計嘅小屋，喺入面可以見到咖啡師沖咖啡嘅認真樣。Chata店內環境非常優美，食物同飲品嘅造型都非常上鏡，啱晒打卡po Instagram。
奶茶布丁（118 baht）、枸杞布丁（108 baht）
曼谷唐人街嘅Ba Hao Tian Mi，雖然係新開嘅cafe嚟，但已經出晒名係打卡聖地，好多cafe愛好者都慕名朝聖。Ba Hao Tian Mi嘅店面雖然細，但勝在菜單夠吸引。要數最多人影相打卡嘅，就一定係「布丁」啦﹗奶茶布丁，同枸杞布丁都相當吸睛。當然呢度嘅裝修都一樣咁吸晴，打卡一流啦﹗
藍莓撻 （135 baht）、熱Latte （70 baht）、B-Forest （145 baht）
B-Story Café鄰近Ratchathewi地鐵站，開咗好耐的啦，佢哋嘅嘢食同甜品一直都好受歡迎。B-Story Café佔兩層樓高，內外裝修都大玩復古風，乾花束、熊啤啤、壁爐、蠟燭等復古元素隨處可見。企喺cafe嘅任何一個角落都可以影到靚相，再影埋佢哋造型吸引嘅甜品同飲品，絕對可以呃到好多like呀 。
花茶（180 baht）、馬拉炸雞 （79 baht）、鮮蝦春卷（59 baht）、檸檬茶蛋糕（80 baht）
Lhong Tou Café同樣位於唐人街，佢哋嘅裝修同嘢食出晒名靚。而佢哋嘅小食走中國風，食完再飲返啖咖啡或茶，簡直係完美配搭呀﹗佢哋提供各式各樣嘅茶，例如熱花茶、泰式拉茶、凍檸茶等，當然唔少得咖啡啦﹗如果你想坐呢度嘅特色wall table嘅話，就要等一陣啦﹗但絕對值得！
玫瑰雪糕配雞蛋仔 （130 baht）
Café La Rose位於Ari區，佢唔單止係cafe咁簡單，更加係一間花店。成間cafe都畀大大小小嘅花包圍住，即時少女心大發。而Café La Rose嘅菜單靈感同食材絕大部份都來自玫瑰，或者各式各樣嘅花，所以形容Café La Rose為「玫瑰cafe」或者「花花cafe」真係適合不過。玫瑰形狀嘅雪糕係Café La Rose嘅招牌菜，雪糕口味由唔同材料調味而成 ，包括蝶豆花茶、玫瑰奶茶、士多啤梨、玫瑰等。如果你鍾意少女風嘅話，咁你喺Café La Rose一定可以瘋狂影相打卡啦﹗