去曼谷旅行，Nara Thai Cuisine係旅客必吃嘅泰國餐廳之一，自2007年起連續十年被當地雜誌《Thailand Tatler》票選為最佳泰國食府，菜式精緻同價錢亦大眾化，環境舒服，而且唔少大商場都有分店。最近Nara落戶香港新城市廣場，唔使去泰國都食到喇！
Nara Thai Cuisine於2006年開設首間餐廳，以船麵及經典家常菜為主打，後來先發展成為精緻泰菜，最多港人食過應該係Central World分店，於新加坡、越南、台灣等均設海外分店。香港店室內設計亦參照當地，環境時尚舒服，仲有梳化位及吊扇，幾relax。
無論係邊個國家嘅過江龍來港，最緊要就係保持當地一樣質素同味道。香港店請來Nara兩位泰國總廚監督，廚師班底有一半為泰國人，而且亦曾往泰國受訓，確保唔會走樣。餐牌上面食物都係來自總店，暫無香港獨有菜式，而且做法、食材來源甚至係品牌都盡量同泰國店一致，可以放心！
Nara原先以船麵起家，所以香港店都有齊三款口味，泰式牛肉船麵以牛骨、豬脊骨及桶骨、雞腳等熬湯，加入檸檬葉、斑蘭葉、泰國芫茜、洋葱、桂皮、丁香、八角等香料熬約3小時而成。當地通常加新鮮豬紅，香港就以豬紅替，靈魂所在係自家低溫炒製辣椒醬，湯底香辣濃郁，香料味突出。配料就有肥牛、泰國牛丸、牛腱、豬油渣及炸豬皮，好食！不過幼金邊粉好快索湯，上枱要快食。
泰式牛肉船麵 $98
豬骨湯味道較清，同樣以豬骨及雞熬成，味道微酸辣好開胃，配料就有豬肉片及泰國豬肉丸，好彈牙。彩虹湯以豬骨湯做底，泰式紅豆腐醬由泰國入口，以南乳、蕃茄及紅醋等製成，呈粉紅色，大廚加泰國芫茜、香茅等炒香，配上泰國長形魚蛋、魚片及炸魚皮，入口有少少甜味及南乳香。
清湯冬蔭功豬肉粉絲 $78
彩虹湯魚片米粉 $78
餐廳仲有好多招牌菜，其中生菜包東北豬肉丸係泰式東北菜，以豬脢頭及腩肉加入自家以香茅及青檸汁烘製的糯米粉、辣椒及香料炸成。點啲酸子辣椒汁再用生菜包住食，辣辣哋又有香草味。
生菜包東北豬肉丸 $88
另一少見菜式為肉碎生菜包米粉，泰國入口米粉米香濃，配上蠔油冬菇肉碎、炸札肉、鹹蛋同辣汁用生菜包住同吃，比起食開嘅生菜包更富層次感。
肉碎生菜包米粉 $88
黃咖喱軟殼蟹都係必食，咖喱汁加入蛋黃製作，煮得香滑唔會老，送飯一流！軟殼蟹亦夠厚肉鮮甜，炸得鬆脆唔會太厚粉。
黃咖喱軟殼蟹 $188
泰式香草脆魚炒蝶豆花飯，蝶豆花熬水加入香茅、斑蘭等煲飯，藍色均勻染上飯粒，然後調味再炒。炒飯內有泰國鹹魚，先蒸後炸減低鹹度，亦有乾辣椒、炸香茅碎等材料，鹹香惹味。
泰式香草脆魚炒蝶豆花飯 $88
更多新店直擊： |
其他必吃菜式推介：
泰式生蝦 $118
泰式三文魚刺身($108)連埋薄荷葉點汁食，味道辣勁酸香。
冬蔭功 $108，泰式蝦醬炒河粉 $98
青芒札肉沙律 $88、札肉米紙卷 $78
地址：沙田沙田正街18號新城市廣場一期5樓507號舖
文、相、片：Perrins