提到早餐店通常都會諗起台灣，因為香港地咁高租金，比較少舖頭專賣早餐。估唔到油麻地呢條旺中帶靜嘅巷仔就開咗間全日只賣吐司同早餐嘅早餐店，吐司即叫即整又足料，All Day Breakfast又抵食，加多杯奶茶或者咖啡，係一個完美嘅Good Morning呀。
 

叁拾壹堂高烤吐司位於油麻地德昌里，由港鐵站行去都有一段距離，不過就係因為咁更有一份恬靜嘅感覺。門面走簡約風格，舖仔唔大以外賣為主，不過亦有三張吧枱可以畀大家堂食。Menu主要分為早餐、吐司、小食，同飲品。
 

多層次蛋吐司（吐司$28，套餐$55）

招牌口味係呢份多層次蛋吐司，顧名思義烘過嘅麵包裡面夾住一層層煎蛋同薯仔醬。薯仔醬用薯蓉、紅洋蔥加秘製醬汁調配而成，甜甜地帶薯蓉嘅沙沙口感，同雞蛋香又幾夾。

而且薯仔醬落得幾重手，建議大家用紙包實嚟食，如果唔係就會咇晒出嚟！麵包可以選擇烘或者唔烘，會加少少牛油，令吐司更香之餘，擺得耐咗麵包亦唔會過腍。
 

叉燒炒蛋吐司（吐司$28，套餐$65）

吐司都可以有港式口味！五香肉丁吐司同叉燒炒蛋吐司同樣受歡迎，叉燒係店主特別請相熟燒臘店供貨，即叫即煎香再淋上秘方照燒汁。配料仲有脆邊煎蛋、青瓜絲、芽菜同唔少得嘅薯仔醬。

唔直接用叉燒炒蛋係希望增加口感層次，加上青瓜絲同芽菜嘅爽口清新，令呢份吐司無想像中咁膩，味道就以叉燒肉香為主。不過開飯仔就覺得乾身咗少少，如果雞蛋可以保留少少蛋汁，或者加多啲照燒汁就完美啦。所有吐司都可以轉套餐，會多一份炸薯條同飲品。

 

簡約早餐（$20）

$20一份早餐真係邊度搵！個名雖然叫簡約，但有齊香腸、火腿、餐肉、煎蛋或炒蛋、咖啡或茶，仲要即叫即整，雖然味道無乜驚喜但勝在夠抵食！另外仲有份豐富版嘅全日早餐（$85），豐儉由人。

餐廳一角係店主手寫嘅木牌，啱啱好係31塊，貼合返店名叁拾壹堂。原來31係店主嘅Lucky Number，亦係店主嘅生日日期，所以就用咗嚟做店名，而高烤吐司就係高溫烤吐司咁解。裝修係參考日本京都古都小店，加埋手寫木牌又頗有文青Feel，開飯仔採訪期間就有唔少學生嚟食吐司兼打卡啦。
 

叁拾壹堂高烤吐司
地址：油麻地德昌里1-9號德喜大廈地下4號舖

文、相、片：Cathy