暑假放到一半，要同小朋友玩埋剩餘嘅一個月！天氣咁熱喺室外玩，大汗疊細汗都幾辛苦，不如轉場去室內遊樂場玩啦！石門呢間親子餐廳開業大半年，一直都好受歡迎，有得食有得玩，爸爸媽媽同小朋友都可以enjoy！
餐廳佔地九千呎，面積好大，每節限制入場人數最多120人，所以夠晒空間玩！一半為用餐區，另一半就係遊樂場，玩意極多。成個滑梯攀爬設施都係請人設計，有安全認證，唔會有索帶、尖頭位造成危險，遊樂區亦有專人駐守，確保安全。
小朋友見到最興奮應該係好大個波波池，入面嘅波波係用日本抗菌物料自家訂造，絕對唔係淘寶貨。粉色配搭柔和又夢幻，而且夠深，可以周圍「游來游去」！
上層有好大個七彩繩網，靚得來又有好多玩樂位俾小朋友放電，包括一條長長旋轉滑梯。亦有巨型氫氣球、投影AR房等，有排玩！
靜態啲玩意有超市主題區，小朋友可以搜購食材再去收銀處埋單，同爸爸媽媽玩角色扮演。食物、設施都做得好細緻迫真，好多detail位。兩歲以下幼兒區都有嘢玩，好多刺激小朋友發展嘅玩意，好似係學唔同顏色、數手指、鍛鍊手腕動作，俾小朋友邊玩邊學習。
更多飲食潮流： |
一般親子餐廳食物較簡單，Kidskiss都幾著重食物質素，似一般西餐廳講究。首先選擇多，由小食、意粉、主菜、甜品都有，份量十足。招牌菜包括自創焗豬扒飯漢堡，將酸甜焗豬扒飯作漢堡餡料，有創意之餘小朋友亦啱食。
Kidskiss 焗豬扒飯漢堡 $168
原隻小龍蝦濃湯以蝦頭、蝦殼熬成，味道香濃鮮甜。另一款牛油焗原隻扇貝配椒絲炒扁意粉，用上新鮮連殼扇貝，意粉就有少少辣，可以走辣俾小朋友食。
原隻小龍蝦濃湯 $168
牛油焗原隻扇貝配椒絲炒扁意粉 $198
當然亦有照顧到小朋友口味嘅兒童餐同炸物，兒童餐有五款，A餐有自製意式豬肉丸、粟米意粉，亦有一杯切粒生果杯，相當細心。親子天婦羅有小朋友最鍾意嘅炸物，有天婦羅炸蝦、日式餃子、炸魚手指、薯角及炸乳酪。
兒童餐A $108
Kidskiss親子摩天輪 $188
餐廳不時有時令推介，夏天有冰涼特飲，嚟緊亦有下午茶tea set。小朋友玩緊時，家長們就可以開心嘆茶食甜品。
夏日熱辣辣、藍天白雲 $58
餐廳收費成人設最低消費，小朋友就收入場費，每節兩小時45分鐘，夠晒時間玩同食。每日三節，每節中間會消毒清潔，每星期四早上亦會閉場作大清洗，相當衛生。溫提小朋友只限12歲或以下人士進入玩樂區，而且入場最好預先訂位，可經OpenRice網上訂座，非常方便。
想search邊度有親子餐廳？即於食品／餐廳類型中剔親子餐廳為篩選條件，即列出全港親子餐廳！大部份都有網上訂座服務，訂埋位先同小朋友出發啦！
地址：沙田安群街3號京瑞廣場一期1樓162號舖
文：Perrins
相、片：Calvin Kwok