台式飲品店多到好似便利店咁，總有一間喺左近，最新呢間台灣過江龍就被喻為老虎堂勁敵！主打選用日本沖繩黑糖煮珍珠，可以配厚奶、或者比較少見嘅紅茶同炭燒烏龍！茶底濃郁，飲落唔會過於甜膩。
 

吉龍糖黑糖紅茶專賣店曾被台灣TVBS《食尚玩家》喻為老虎堂最強對手，香港首店就開喺旺角登打士街，認住黑色招牌同打卡紅磚牆就得。香港店大部分食材，例如茶葉、珍珠、黑糖都同台灣店一樣，除咗牛奶就改用明治4.3鮮奶。
 

黑糖選用日本沖繩黑糖，細心睇品牌Logo上1646即係黑糖成為當時琉球王朝專賣商品嘅年份，喺台灣由專人手炒成黑糖漿再運到香港。珍珠沿用台灣店配方每日新鮮熬煮，煮好後只會用兩個鐘，亦建議大家喺一個鐘頭之內飲完，確保珍珠口感得宜。
 

黑糖珍珠厚奶（$30）

飲品為店方完美比例，無得揀甜度同冰量。厚奶指喺鮮奶上面再加一層用牛奶同忌廉打成嘅奶霜，增加柔滑口感同牛奶香。攞上手底部嘅黑糖珍珠暖暖地，黑糖紋亦算明顯，不過擺大概三分鐘就會變少。店方解釋因為珍珠用手炒純黑糖，並無加任何色素或焦糖，所以掛杯效果維持唔到太耐，想打卡嘅朋友記得快手啲啦。

教大家一個小竅門，黑糖漿沉哂喺底，飲用前可以先倒轉杯身再搖勻，見到顏色均勻起埋泡咁就代表飲得啦。厚奶奶香果然明顯，黑糖珍珠就略嫌太軟腍，不過就方便一班飲得慢嘅朋友仔，就算啲冰融哂珍珠都唔會太硬。最值得一讃嘅係珍珠夠哂入味。

黑糖珍珠紅茶（$22）

鮮奶飲得多，原來黑糖珍珠配紅茶都唔錯。紅茶同炭燒烏龍選用台灣茶葉，茶香濃郁。配黑糖珍珠飲落無配鮮奶或者厚奶咁甜，而且茶甘可以突出黑糖嘅獨特甜香，係相對清新嘅一款飲品。而且無牛奶嘅飲品可以調整甜度同冰量。
 

吉龍糖黑糖紅茶專賣店
地址：旺角登打士街43S鴻輝大廈地下B號舖

文：相、片：Cathy