提到復活節，相信大家第一時間除咗耶穌同復活兔之外，都會聯想到色彩繽紛嘅復活蛋！其實就算唔落食用色素、唔用朱古力「扮」蛋，營養豐富嘅雞蛋無論作為配角定主角都依然係咁百變！

 如果捨得買生食級雞蛋，咁就當然係配白飯加豉油已夠正！

滷水蛋 / 醉蛋

只要買汁料返嚟連埋雞翼一齊煲滾佢，之後再好好放雪櫃儲存就可以分幾次享用！記得喎，如果係整醉雞翼同醉蛋，煲滾之後攤一攤再放入雪櫃浸一晚先再拎嚟食，即刻食嘅話，未夠入味啊！

蛋沙律

 圖：thecookierookie

白烚到隻蛋熟哂唔流心覺得浪費咗？唔會！只要將佢瘋狂切/壓碎，再撈啲沙律醬同香草（仲可以加烚熟嘅薯仔碎！）夾三文治、沙律菜、焗薯都得！

蛋包飯 / 奄列

打蛋唔小心打穿咗個黃，整唔到太陽蛋？唔怕！除咗即刻變炒蛋之外，仲可以發勻佢令佢變成蛋包飯/奄列！做法只係煎靚個Shape唔好穿，倒飯/奄列料（火腿/蘑菇/粟米）落去包好就得！想外型靚再靚啲，可以隔住廚房紙用手調整下，之後再加返個番茄汁/咖喱汁或忌廉汁，掂晒！

炒蛋

炒蛋想做到西式又得、中式亦得，想西式啲就加淡忌廉同牛奶一齊發勻，炒出嚟就會滑一滑！而加少少清雞湯就可以變成番茄炒蛋、秋葵炒蛋，甚至係菜脯蛋餅！

蒸蛋

 圖：Onolicioushawaii

成日聽人講蒸水蛋好易蒸得老/唔夠熟？其實真係唔使諗得太複雜，蛋液同凍滾水（已滾過攤凍咗嘅水）比例大概係1:1.5，即係打完一隻蛋就用返嗰半隻蛋殼裝返大概3次半殼水就差唔多！之後再加多少少清雞湯，放入蒸焗爐/大鑊蒸返3-4分鐘先，然後拎支牙籤篤正中心，見到表面唔流質，同埋上面冇黐任何嘢上去就可以加豉油同蔥開飯！

文：Apple
編：Kar