春天陽光和暖，最啱約埋三五知己或者屋企人，一齊嘆個悠閒下午茶，感受一下小確幸。而且下個月就係母親節喇，不如提早帶媽媽去嘆個靚tea做慶祝前奏啦～

春日藝術下午茶 FINDS   

向西班牙傳奇藝術家畢加索致敬嘅「立體主義」藝術下午茶，配合即將展開嘅大型藝術展覽，一齊享受一場集味覺、視覺同藝術氛圍於一身嘅優雅下午時光。靈感來自立體派畫作，以幾何線條同拼貼設計，創作出一系列高顏值鹹甜點。法式鴨肝凍批、冷熱煙燻三文魚三文治同甜蝦牛油果撻都巧妙融入北歐風味。甜點方面，抹茶慕絲、櫻花果凍、芒果馬卡龍配色繽紛，擺盤用上畫家調色盤作底碟，令人仿如置身畫室。除咗可配茶或咖啡，更可以加配兩款限定特調——藍天色嘅「Azure」以及色彩層次豐富嘅「Perspectives」，適合鍾意影相打卡又想享受悠閒下午茶嘅朋友。

供應時間: 即日起至2025年5月31日，下午3時至5時30分

以芙烈達．卡蘿主題下午茶體驗 香港麗晶酒店大堂酒廊

呢間酒店就同香港芭蕾舞團攜手，推出以墨西哥傳奇藝術家芙烈達．卡蘿為靈感嘅藝術下午茶，以芙烈達筆下嘅繽紛色彩、自然意象為主題，將墨西哥風味同法式糕點完美結合。下午茶點有多款別具創意之作，例如Frida Garden用接骨木花、日本士多啤梨醬同忌廉製成，酸甜清香；Viva La Vida則以檸檬柚子慕絲配番石榴，入口清新。而鹹點方面則主打墨西哥元素，有牛油果醬、辣椒蛋黃醬等配搭嘅手指三文治，以及香料乳清芝士餡餅，層次豐富。飲品方面有蝶豆花調製嘅藍色之家雞尾酒、花香四溢嘅Frida’s Orchard無酒精特飲，為春日午后加添藝術氣息同異國風情。

供應時間: 即日起至2025年5月8日

福祿生花祈願花園下午茶 Tomacado花廚  

喺繁忙都市之中想感受一吓寧靜，呢個下午茶就啱晒。下午茶靈感源自自然四季同祈願文化，甜品造型細緻精巧，例如以北京祈年殿為設計靈感嘅「祈年如願」朱古力慕絲，造型吸睛之餘味道亦細膩濃郁；而「紫氣東來」紫薯醒獅糕則綿密香甜，喻意春來運轉。鹹點如無花果桂花煙燻牛肉牛角包鹹香中帶微甜，令人印象深刻。最後配上以洛陽牡丹花王沖製嘅龍眼蜜花茶，花香淡雅，令人回味無窮。

供應時間: 即日起至另行通知

小王子的奇妙旅程下午茶 獅房菜  

鍾意小王子嘅fans留意喇！呢個小王子主題奇妙旅程下午茶以法國經典文學為靈感，呈現出一系列極具童話感嘅鹹甜點，邀請大家一齊遊歷B612星球！下午茶設計細緻講究，例如藍莓芝士白朱古力慕絲蛋糕以小王子與玫瑰作主題，甜中帶鹹；「生命萬歲」以番石榴配檸檬慕絲，呈現出春日活力。而鹹點方面，鴨肝醬脆餅配紅桑子啫喱，香濃中帶微酸，令味蕾充滿驚喜；煙三文魚慕絲撻則以滑溜慕絲同酥撻交織，令人難忘。加上以小王子歷險為主題調製嘅兩款限定梳打特飲，令整個下午茶體驗更添奇幻詩意。

供應時間: 即日起至9月30日

綠韻物語下午茶 Paper Moon  

擁有無敵維港景致嘅餐廳，呢個綠韻物語春日限定下午茶，將大自然嘅朝氣活力融入每一道鹹甜美點之中，更附送逆時光護理禮盒，無論打卡定犒賞媽媽同自己都啱晒。下午茶主打以綠色天然食材入饌，頭盤如熱辣辣鐵板肉眼扒配阿根廷青醬，肉味濃郁又多汁，配埋清新青醬提升層次感；即烤青瓜菲達芝士薄餅亦值得一試，外脆內軟，簡單而高質。甜品方面選用抹茶同開心果製作多款甜點，包括抹茶芝士餅、抹茶泡芙、開心果脆捲筒等；仲有迷你朱古力心太軟配抹茶粉、青檸撻同特選朱古力，一定滿足到甜品控！

供應時間: 即日起每日下午3時30分至5時30分（最後點餐時間為下午5時）

文：Yanica
編：Cathy