喜歡食上海菜嘅食家們，應該都對呢間原址喺尖沙咀馬哥孛羅酒店嘅上海菜唔陌生喇。開業廿幾年嚟，合共獲得《米芝蓮指南》頒發13粒米芝蓮星，儲落唔少鍾意食中菜嘅熟客！餐廳最近於K11 Musea選址重開，合共5,500呎，除咗可以飽覽維港美景，建築風格、氛圍、裝飾擺設都充滿上海特色。
新店樓高兩層，上層採用落地大玻璃，結合大型方形酒吧及戶外平台，食客可以一邊飲酒一邊享用上海點心及下午茶。而下層設有豪華絲絨卡位，經典圓桌及VIP包廂，設計簡約奢華，啱晒一家人及朋友聚會。
雖然搬咗新店，但仍然由主廚施萬歲主理，今次仲新增咗唔少菜式帶畀食客，首先係呢個蟹粉鮮肉包，以豬肉同大閘蟹做餡料，蟹味香濃。
八寶辣醬年糕包含八種主要食材，包括豬肉、雞肉、馬蹄、海參、竹筍、冬菇、鮮蝦仁同蝦乾。餐廳八寶菜為靈感，將秘制醬汁、年糕及八寶菜結合。馬蹄爽脆，豬肉多汁，年糕軟糯，口感好豐富。
前菜同樣有新嘢！牛油果素鴨卷幾創新，用自家製腐皮包住新鮮牛油果，牛油果味又幾香。
更多【新店直擊】： |
另一款冷盤香蔥雞髀菇以自製蔥油同青蔥汁醃製脆滑雞髀菇，疊高上碟後撒上辣椒粒，好惹味。
另外餐廳原有嘅招牌菜式都唔可以錯過，紅燒原條牛肋條選用巨型T骨牛肋排，面層淋上餐廳秘製紅燒汁，再撒上蔥花、辣椒粒同芝麻，中和濃郁牛香，肉質都好軟腍。
清炒河蝦仁係上海菜經典名菜，蝦肉爽口彈牙。
地址: 尖沙咀梳士巴利道18號Victoria Dockside K11 Musea 6樓601號舖及7樓702號舖
文: Yanica
相、片: Calvin Kwok