今年香港特別多日本過江龍餐廳，最新呢間嚟自東京，由曾經係日本築地市場最大批發商提供最新鮮嘅漁穫。餐廳宗旨係用時令新鮮食材，帶出「簡單就是美」嘅精神。唔少菜式都用伴鯷魚醬、煙燻等比較「重口味」嘅烹調方式，一夜干爐端燒就係代表菜之一，最啱送返杯日本酒！
 

鯷魚醬伴鮮野菜（$68）

魚治中環店係海外首間分店，日本店行政總廚內山正宏先生會不定期到香港店視察同控制品質。呢道前菜係其中一碟能夠彰顯餐廳宗旨嘅菜式，選用當造新鮮蔬菜冰鎮，再點用蠟燭暖住上枱嘅鯷魚醬嚟食。鯷魚醬有相當濃郁嘅鹹鮮味，但唔會過鹹至難以入口，配冰涼多汁嘅蔬菜對比明顯。特別係口感粉糯又香甜嘅甜薯，同爆汁清新嘅蕃茄仔效果特別討喜。
 

炙燒味噌刺身他他（$88）

喜愛層次分明嘅話，可以一試呢份非常啱送酒嘅味噌刺身他他，刺身他他會選用當日最新鮮嘅漁穫，用味噌醃至入味再炙燒，香氣誘人。記得先將生雞蛋拌勻，倒到刺身他他上面，再用紫菜包嚟食。因為有蛋黃包住刺身他他，所以一開始先係感受到刺身他他軟滑嘅口感，味噌嘅鹹香再慢慢帶出，令人忍唔住一啖接一啖。
 

伴助花魚一夜干（全份 $268）

一夜干意指經過一晚醃漬同風乾，係以前日本人保存鮮魚嘅方法之一。嚟到呢間海鮮居酒屋就成為招牌菜，特別係呢份伴助花魚一夜干差唔多有半個手臂咁長，成條上枱特別有霸氣！側邊位燒至金黃香脆，而魚肚肉比較厚嘅位置又保留到肉汁，同一條魚都可以試到唔同口感。味道鹹香，可以點酸酸地嘅古式梅蜜或者柚子醋醬油享用。
 

吞拿魚尾一夜干（$138）

另有吞拿魚尾版本嘅一夜干爐端燒，因為魚尾係郁動比較多嘅部位，魚肉口感食落亦比較結實，味道則帶吞拿魚獨特嘅油脂香。
 

蟹味噌甲羅燒（$98）

甲羅即係蟹蓋，顧名思義呢道菜係將用蟹膏味噌放上蟹蓋再燒，記得要趁熱享用！蟹膏嘅鮮味、味噌嘅鹹香加上蟹肉一絲絲嘅口感，配搭得宜。 雖然比起一夜干嚟講分量唔大，但每一啖都係風味十足。
 

 

北海道男爵薯伴牛油及辛魷魚（$78）

嚟自北海道嘅男爵薯仔係日本兩大名薯之一，特點係鬆軟而帶澱粉甜味。呢度做成爐端野菜，無將薯仔燒至過腍，反而保留少少爽口口感，配以彈牙惹味嘅鹽辛魷魚，味道同口感平衡都啱啱好。
 

厚揚豆腐（$58）

上面唔少料理都係適合送酒嘅「重口味」，呢道厚揚豆腐就以食材本身味道為主喇。特別選用黃豆比例較高嘅豆腐，厚炸後外酥脆內軟滑嘅口感對比更為明顯，可以點少少二度發酵醬油享用。
 

（左）伯樂星東条秋津山田錦純米大吟釀（$120/90mL）、（右）雪之茅舍純米吟釀（無濾過原酒）（$65/90mL）

嚟到居酒屋點可以少咗美酒？呢度供應果酒、燒酎、Gin酒、生啤、威士忌等等，最特別嘅就要數到日本嘅地方酒。伯樂星東条秋津山田錦純米大吟釀用「酒米之王」山田錦米釀造，口感細緻味道甘甜清爽。
 

而富甜香嘅純米吟釀會比大吟釀更易入口，適合品酒初入門嘅朋友。同樣用山田錦米釀造，口感則更柔潤，有少少水果甜香而後韻帶酸。當然你亦可以喺點菜嘅時候請店員推介適合配搭嘅酒啦。
 

餐廳環境舒適，Open Kitchen增加互動同活力，最值得一讃嘅係手寫餐牌畫上一目了然嘅插圖，令人感覺特別輕鬆溫暖。另一個亮點係門口係比較低嘅和式設計，背後理念原來係所有客人都需要彎低身嚟到居酒屋，因而餐廳對所有客人都係一視同仁㗎呢。
 

魚治
地址：中環威靈頓街2-8號威靈頓廣場M88 7樓

文：Cathy
相、片：Tom Li