曼谷米芝蓮結果塵埃落定，部分熱門餐廳未能奪星而令人大跌眼鏡，其中之一就係Le Du。呢間餐廳於2017年亞洲最大50餐廳排名37，年輕大廚兼老闆Chef Ton喺美國學廚並於名店如Eleven Madison Park及The Modern工作，將法國菜嘅細緻做法及賣相融入泰菜中，係曼谷當紅餐廳。本來奪星嘅呼聲相當高，不過最後只被納入書中而冇獲得任何星星，實在可惜呀！
餐廳名Le Du泰文解作季節，Chef Ton對材料要求好高，不時不食之餘，仲堅持一定要用泰國本土食材，希望可以呈現100%泰國風土味道。好似來自泰北嘅蔬菜、泰南盛產海鮮等，亦會搵到好刁鑽嘅材料，好似海葡萄、產自清邁嘅牛油果等。就算比起外地入口貨未必係最靚，佢就要用唔同做法令到食物變得好味，同埋支持返本地社會，好有想法！
Chef Ton亦擅用唔同食物配搭，令一道菜之中有唔同層次感，而且睇落似法國菜，但食落就完全係泰國味道。前菜西瓜三吃，有西瓜汁配泰國九層塔油、傳統小食mahor配西瓜啫喱同埋西瓜皮配魚皮，好清爽。可持續海魚配上黃薑咖喱汁，燒豬頸肉配南瓜醬味道濃郁又腍身，而大頭蝦配蝦醬risotto亦都好驚喜！
前菜西瓜三吃
醃海鱸魚配清邁牛油果、薑及青瓜
小龍蝦配生蠔莎巴翁、沙葛及海葡萄
可持續海魚配竹筍及黃薑
大頭蝦配蝦醬飯
炭燒豬頸肉配南瓜醬
斑蘭蛋糕配泰式奶茶雪糕
晚餐四道菜1,690 Baht，六道菜tasting menu就 2,990 Baht，唔算平架，但食到好似法國菜咁精緻嘅泰菜，唔係間間都食得到。
地址：399/3, Soi Silom 7, Silom Road, Bang Rak, Bangkok, Silom
更多曼谷米芝蓮推介：
文、相、片： Perrins