又到一年一度嘅書展，除咗去買書仲可以買零食？！因為今年香港貿發局首度主辦「零食世界」，當中有多款精選環球零食，仲好貼心咁分為日韓街、台灣街、朱古力及糖果工房、懷舊零食等多個區域，入場前先揀下有咩心頭好啦。
 

香港品牌

NuttieB 抹茶腰果醬、焙茶腰果醬

本地手工製堅果醬品牌，由營養師經營，標榜無添加油、糖或防腐劑。抹茶腰果醬同焙茶腰果醬呢兩款就最啱各位抹茶同焙茶控，前者用小山園及靜岡抹茶粉，後者用小山園焙茶粉，茶香濃郁，甜度適中得嚟又唔會苦。

攤位：新亞薑糖（香港）有限公司（5B-B05）

PBJ 玉荷包荔枝果醬、啤梨伯爵茶果醬

本地果醬品牌，100%新鮮水果製作，不含防腐劑或人工香精，部分添加香草、茶葉、冰糖熬煮提味。例如啤梨伯爵茶果醬加入Twinings伯爵茶葉。玉荷包荔枝就用咗高雄「阿順伯」玉荷包荔枝製作，產期只得一個月零舍珍貴！

攤位：PBJ（5B-A24）

趣香蝦子花⽣ 原味、黑松露味

品牌1949年喺澳門創立，後來喺香港屯門設廠，每日新鮮製作各款零食。蝦子花生源於創辦人想結合蝦片同花生兩款小食，就將花生裹上特製粉漿再炸，外酥內脆雙重驚喜！除咗原味，仲有粒粒蝦籽、鹹蛋黃、麻辣、蜂蜜奶油，同黑松露口味。

攤位：趣香食品製造廠（5B-A21）

龍記 原味蛋卷、咖啡蛋卷

100%香港製造蛋卷品牌，以傳優質材料加上自家配方秘製，蛋味濃郁，入口即化！原味之外咖啡味都好受歡迎。

攤位：Ming Fung Enterprises (Hong Kong) Limited（5B-A28）

甄沾記 椰子雪條、脆脆椰

1915年創立嘅品牌，主打嘅椰子糖係唔少香港人由細食到大嘅懷舊味道。嚟到夏天就可以試下佢哋嘅椰子雪條，手工製作，唔單止有椰汁香，仲會食到啖啖椰青肉呀。另外仲有新出嘅脆脆椰，用100%純天然椰子肉製作，非油炸但又有薯片咁嘅爽脆口感！

攤位：甄沾記香港有限公司（5B-A18）

Glee 健康花茶

本地NGO新生精神康復會社企「慧」顧惠群嘅出品，消費嘅時候可以幫助精神病康復者重建新生。花茶各有唔同養生功效，例如金桂花有可以明目、養顏、化胃氣，洛神花就有助調理氣血、養顏、助消化。

攤位：New Life Psychiatric Rehabilitation Association（5B-A30）

各地零食

六月初一 8結蛋卷

台中近年最熱門嘅手信推介之一，用精選紐西蘭奶粉、特級麵粉等材料製作，不含牛油或防腐劑。每件蛋卷都係酥脆有層次嘅「8」字形。有原味、芝麻、咖啡、海苔同朱古力五款口味。

攤位：鼎閱科技有限公司（5B-C10）

青鳥旅行 蛋卷

台灣熱搶手工蛋卷仲有呢間青鳥旅行，喺呢度就搵到佢哋嘅唔同口味，例如選用比利時85%黑朱古力嘅醇黑真巧蛋捲、鐵觀音餅皮配搭鐵觀音朱古力餡嘅鐵觀音真巧蛋捲、加入Twinings伯爵茶嘅伯爵真巧蛋捲等。

攤位：旭舜有限公司（5B-B27）

海邊走走 激厚莓果蛋卷、Magi Planet 莓好愛情爆米花

講到台灣蛋卷當然唔少得海邊走走，呢個激厚莓果蛋捲係今年新出口味，用100%天然士多啤梨配搭5倍厚實蛋捲餅皮，裡面再加入新鮮蔓越莓，酸酸甜甜。而Magi Planet莓好愛情爆米花即係士多啤梨牛奶口味，同樣啱鍾意士多啤梨嘅朋友仔。

攤位：顯利高企業有限公司（5B-C12）

快車肉乾 快車元氣條、月見炙燒豬肉乾

源自台灣南門市場嘅手工肉乾品牌，採用新鮮豬後腿肉，高溫烘烤逼出鮮甜肉汁，越嚼越香。快車元氣條係切成1cm厚嘅條狀，Q彈多汁。而月見炙燒豬肉乾就加上蜜汁煙燻，又香又甜。

攤位：商營實業有限公司（5B-B25）

myEureka爆谷 鹹蛋、洛神花、奶油糖、美祿口味

嚟自馬來西亞嘅品牌，喺吉隆坡全手⼯製造而且選用非基因改造原材料。19款唔同口味任君選擇，特別啲嘅有鹹蛋、洛神花同奶油糖口味，特別係洛神花粒粒粉紫色，帶花香而且味道酸甜，有啲似士多啤梨味。而新出嘅Cocoa Malt即係美祿口味，味道濃郁，建議配牛奶一齊食！

攤位：松海國際發展有限公司（5B-C13）

NUTCHIES 樂脆腰果

新加坡腰果零食品牌，採用人手精心挑選嘅非基因改造腰果，以全烤焗非油炸方式製作，不含防腐劑、反式脂肪或膽固醇，香口得嚟又健康。有成13款口味，包括鹽味焦糖、車打芝士、香甜粟米等，展場仲有唔同優惠呀！

攤位：昇喜國際有限公司（5B-C31）

金箔貓山皇榴槤芝士蛋糕、貓山皇榴槤麻糬

鍾意食榴槤嘅朋友留意返，佢哋嘅金箔貓山皇榴槤芝士蛋糕唔單止有金箔點綴，上面鋪滿貓山皇果肉好搶眼呀。貓山皇榴槤麻糬由馬來西亞製造然後直送到港，完全無任何人造香精或防腐劑。外皮冰涼，餡料Creamy入口即溶！

攤位：唯思有限公司（5B-B01）

芒果冰條、榴槤冰條

天時暑熱想食返啲冰凍甜品？呢度就有泰國進口，標榜用100%新鮮水果製作而成嘅水果雪條！不過溫馨提示返場內包括展位內都唔可以飲食，想食不妨自己帶埋保溫袋嚟入貨，返到屋企慢慢嘆。

攤位：有淳有限公司（5B-B12）

健康精選

Uncle Saba's 健康扁豆脆片

馬來西亞製作健康扁豆脆片，以扁豆製作，口感似薯片咁脆但不含反式脂肪或膽固醇，仲有豐富蛋白質同膳食纖維！共七款口味，有東南亞特色嘅辣椒蟹同冬陰海鮮味，亦有常見嘅酸忌廉同蕃茄味。

攤位：Chase Superwin Limited（5B-C07）

優必 乳酸菌飲品

日本乳酸菌飲品，含益生元成份而且不含反式脂肪酸，有助維持腸道健康。每支飲品都從日本空運到港，味道清甜。有原味、菠蘿味、減少2倍糖份同添加骨膠原嘅Lite版，同季節限定嘅櫻花味！

攤位：駿馬達國際控股有限公司（5B-D05）

Minor Figures 飲品、Pana 朱古力

素食朋友都有零食推介畀你，Minor Figures係英國品牌，唔少香港嘅咖啡店都有用佢哋嘅燕麥奶，其實品牌仲有一系列飲品，包括咖啡拿鐵、抹茶拿鐵等。而Pana朱古力就係澳洲品牌，標榜純手工製作、不含麩質或牛奶成分，食純素嘅朋友都食得。

攤位：以勒國際健康有限公司（5B-A01）

Goodio Bean-to-bar手工朱古力、Bonne 芬蘭姆明零食果蓉

Goodio係芬蘭純手工朱古力品牌，不含乳製品而且無大豆或麩質，適合純素人士。朱古力有薑餅、咖啡、士多啤梨等口味。Bonne 芬蘭姆明零食果蓉唔單止包裝印上可愛姆明圖案，有機果蓉即開即食，好啱畀小朋友當茶點呀。

攤位：宏展（香港）投資有限公司（5B-A02）

【第31屆香港書展、香港運動消閒博覽、零食世界】
日期：2021年7月14至20日（星期三至二）
地址：灣仔博覽道1號香港會議展覽中心
開放時間及入場詳情：https://hkbookfair.hktdc.com/tc/index.html  
場地防疫措施：https://hkbookfair.hktdc.com/tc/Visitor/Health-Tips.html