暖笠笠「芝」選！香港地邊度有芝士火鍋？

是咁的，講到禦寒「好西」，唔少人第一時間應該都會諗起打邊爐、雞煲、羊腩煲......其實，仲有個鍋物畀唔少人遺忘咗：嚟自瑞士嘅芝士火鍋呀！喺香港，除咗連鎖店意粉屋同必勝客之外，其實仲有唔少餐廳有唔同特色又「芝」味嘅芝士火鍋！

正宗瑞士式芝士火鍋

復古瑞士小鎮Feel　　瑞士餐廳

尖沙咀呢間開咗差唔多二十年嘅瑞士餐廳環境唔錯，小木屋裝潢古色古香得嚟又特別覺得Warm。傳統瑞士芝士火鍋係沿用瑞士籍老闆嘅秘方選用唔同芝士配搭，而且跟足瑞士做法加入白酒，芝士香味濃郁。配料有好幾種選擇，由最正宗嘅配法包，到比較豐富嘅牛肉丸、薯仔等都有。

酒店浪漫情調加分　　瑞樵閣

圖：WingCLi

如果Budget比較充裕，就梗係揀尖沙咀半島酒店呢間餐廳啦。環境更舒適之餘，燭光同Live Music增添一份浪漫，加埋酒店體貼服務，男士們帶女神嚟肯定加哂分！芝士火鍋口味只有一款選擇，勝在濃稠度啱啱好，香而不膩。簡單點麵包、通心粉同薯仔都可以食到不亦樂乎。

旺中帶靜小營地　　派格餐廳

圖：eat_eat_everyday

相反一班Friend柴娃娃嘅話，咁可以考慮旺角呢間Camping主題德國菜餐廳，雖然位於旺區但入到餐廳感覺特別舒適。雖然同真正正宗瑞士式嘅有啲唔同，但佢地嘅山區芝士火鍋套餐依然帶少少酒香，值得一試。配料就有唔少得嘅麵包粒、雜錦蔬菜同德國雜錦香腸拼盤。

Fusion風格芝士火鍋

韓式邪惡芝士火鍋　　Sodam Chicken

圖：ilovedisneyland

講到近年嘅熱潮，除咗芝士當然仲有韓國菜，而銅鑼灣呢間韓國過江龍就順勢推出呢個特級芝士火鍋！混合四款芝士嘅鍋底少一分酒香多一分鹹香，配料有手工流心芝士年糕、紫薯年糕、美國豬仔骨、農夫包等。而且可以免費加添一次芝士鍋底一次，唔少食客都會另嗌炸雞點芝士食！

西式黑松露 vs 中式腐乳　　WOFT

圖：lokyanyan

旺角呢間酒吧唔單止主打手工啤酒，仲有唔少配搭新穎嘅「好西」，包括黑松露芝士火鍋同腐乳芝士火鍋！前者有香噴噴黑松露醬，後者加入本地八珍腐乳，難得兩款Fusion特別得嚟又唔會搶走芝士香，不過味道比較濃啱送酒。每款芝士火鍋都會配長通粉、新薯、麵包粒同椰菜花。

香濃芝士 x 港式雞煲　　米走雞

圖：joggling

雖然佢地嘅黃金芝士雞煲同正宗瑞士芝士火鍋個樣同Package都爭十萬九千里遠，但對於香港人嚟講，呢個芝士雞煲絕對食得過！雞件加埋洋蔥、中芹、芫荽、乾蔥，當然仲有主角芝士粒！加入兩款芝士嘅雞煲一夾即有拉絲效果，食落鹹香惹味。而且食到咁上下就可以加湯打邊爐，一煲兩食。

開飯編輯推介：

熱門文章推介：

隨時接收最新資訊
讚好OpenRice專頁！