嚟緊4月又有一連4日嘅復活節假期喇!當然要同朋友出去relax、嘆返個afternoon tea喇~唔少酒店同餐廳都襯住呢個連假推出特色下午茶,睇下邊間合你意~
目錄
► Art Karnival下午茶套餐:ARTISAN LOUNGE |
Art Karnival下午茶套餐 ARTISAN LOUNGE ![](https://static5.orstatic.com/userphoto/Article/0/88/001MMA2C9121DF5B11E57Dj.jpg)
位於K11 MUSEA呢間好有藝術風嘅餐廳最近推出咗Art Karnival下午茶套餐,食呢個tea真係一場感官體驗,將藝術同食物結合,好似去咗個食物藝術館咁~鹹點有魚子醬立方、北海道漬珍寶帶子、西班牙辣腸雞肉米網脆脆、雅支竹希臘乳酪塔同馬賽克海鮮柱;而甜品則有幻彩閃電泡芙、覆盆子撻、雲呢拿貝殼瑪德蓮、工匠朱古力及開心果蛋糕等。 最特別係食客可以創作自己嘅甜品草莓茉莉花茶慕絲,以可食用嘅朱古力顏料為你嘅甜品添上色彩,又好玩又好食。
供應時間:2023年3月16日至5月31日
復活節主題下午茶 The Lounge
成個下午茶都好有春日氣息~好似甘筍造型、配有幼滑檸檬芝士忌廉嘅甘筍蛋糕,帶有清爽青檸風味同杏仁香氣嘅小雞法式蛋白杏仁餅同埋煎蛋模樣嘅芒果希臘乳酪蛋糕,全部都好可愛。鹹點就有法式火腿芝士黑松露三文治及芝士龍蝦奶油包等,香濃又惹味。指定日子更會設有烹煮站,到時每枱都會有個搗蛋朱古力,敲開朱古力蛋入面會有小驚喜呢~
供應時間:2023年4月1日至10日供應,4月7日至10日將設現場烹煮站
麥蘆卡蜂蜜下午茶 大堂酒廊 ![](https://static5.orstatic.com/userphoto/Article/0/88/001MMA2C9121DF5B11E57Dj.jpg)
春天正係蜜蜂釀造蜜糖嘅好時節,呢個下午茶嘅鹹甜點都以麥蘆卡蜂蜜入饌,除咗味道清甜啲,營養含量比一般蜂蜜高添!推介煙三文魚配檸檬蜂蜜醬,煙燻味道同甜而不膩嘅蜂蜜及微酸嘅檸檬香味相映成趣,層次好豐富。另外仲有炸西班牙紅蝦餅配麥蘆卡蜂蜜,西班牙紅蝦加入餡料後於指定溫度先炸後焗,最後以新鮮蜂蜜柚子粒點綴,香脆惹味又帶清新感。甜品則以法式蜂蜜蛋糕配檸檬忌廉同蜂蜜紅茶慕絲柚子忌廉蛋糕尤其出色!
供應時間:2023年4月3日至7月2日
(2023年4月7日至10日,將會分為兩段入座時段,供應時間為2-4pm及4:30-6:30pm )
創藝非凡下午茶 COCO
想打卡可以考慮呢個創藝非凡下午茶,所有甜鹹點都以調色板盛載,好colourful!鵝肝日式三文治伴芒果甜酸醬,充滿油香嘅鵝肝配上酸甜嘅芒果醬多咗份清新。甜品方面抹茶歌劇院蛋糕都好值得試,抹茶香濃又唔太甜。另外仲有白桃慕絲同荔枝啫喱立方蛋糕,以及配上手工玫瑰荔枝果醬同凝脂奶油鬆餅,睇見都流晒口水。
供應時間:即日起至4月30日供應
復活節經典下午茶 香港麗晶酒店大堂酒廊
可以一邊睇景一邊嘆下午茶就最正喇!嚟到呢間酒店嘆Afternoon Tea,千其唔好錯過係一系列特色蛋糕,特別係可可蛋糕,選用加勒比66% Valrhona朱古力忌廉、焦糖可可豆及榛子果仁糖,朱古力香濃又唔會膩,榛子果仁糖又增添咗口感。椰子蛋糕加入芒果青檸醬、椰子慕斯同椰子焦糖脆粒,又係三重口感同味道,甜味自然。
供應時間:2023年4月7至10日
文: Yanica