旺角新開旺角鍋物店，以日本深海魚鮮做主打，推出視覺浮誇嘅高高鍋系列，以鮮嫩粉紅嘅牛肉或豚肉砌成15cm嘅小山，相信吸引一眾foodies去潮聖一番。

即刻介紹番店子招牌──宮崎A4和牛高高鍋($238)，選用充滿油香嘅宮崎A4和牛，再配以竹輪、赤板魚蛋、冬菇、本菇及時令蔬菜，柯打一客會跟送一壺湯底及一份讚岐烏冬。

廚房先將宮崎A4和牛切成一片片，再用和牛包住椰菜及怡保芽菜，然後放喺鍋中，一座小高山就咁完成。

湯底有5款選擇，分別為：原味鮟鱇魚湯、香濃番茄魚湯、麻辣地獄魚湯、黑松露魚湯及日式豚骨湯。

建議先試原味，以日本直送嘅深海鮟鱇魚件、白胡椒粒、蘿蔔、豆腐、京蔥等每日熬煮8個鐘頭而成，湯色偏白，味道亦覺清甜。

較為新穎嘅黑松露魚湯以鮟鱇魚湯做底，再加入意大利黑松露調配而成，黑松露香氣一向突出、好濃郁，但味道一般。注意，鍋物滾起後要調低火力，減慢湯底揮發，追加湯底嘅話需另外加錢，價錢為$30/壺。而且不設追加配料。

另一款原隻龍蝦海鮮鍋($238)亦相當吸引，因為入面有原隻龍蝦、日本沙白、廣島蠔等海鮮，配埋同樣鮮美嘅原味魚湯都不俗。廚師揀選本地龍蝦，雖然體積細小，但肉質較為鮮甜，而且彈牙度十足。龍蝦頭不太有肉，不過依然在放喺鍋內熬出更多鮮味。其他配料有赤板魚蛋、冬菇、本菇及時令蔬菜。

來自日本香川縣嘅讚岐烏冬一向高質，口感彈牙得嚟又夠滑溜，搭配清甜魚湯就最夾。

另外，餐廳亦供應其他以「鮟鱇魚湯」為主嘅菜式，好似呢個被小火爐保溫嘅海膽伴燒三文魚魚湯脆米泡飯($98)，入面有燒三文魚扒、三文魚籽、海膽、脆米等等，好豐富。

進食之前，先倒入魚湯做成泡飯，然後再將用珍珠米炸至脆身嘅脆米灑少少入泡飯之中再食，會有多一層香脆口感。留意番，泡飯只跟送原味魚湯，不設湯底選擇。

150g宮崎A4和牛丼($180)，以西餐燒牛扒方法，將和牛燒至5-6成熟，肉色見紅但不帶血，然後將和牛切片，並鋪喺珍珠米飯上，再依次加入日本雞蛋黃、意大利黑松露醬、日本芥末漬，以及用牛骨、蘿蔔熬約2、3小時嘅燒汁。

經火燒後，和牛油脂感更香濃，而且都幾多汁，加埋濃濃蛋漿，口感更滑溜。丼飯跟送味噌飯。

溏心蛋伴A4燒和牛($88)，嚴選日本廣島新紀元雞蛋，並以味醂調味，製作出半流心狀嘅溏心蛋。上面仲有用火鎗輕輕燒過嘅和牛及黑松露醬，味道好balance，亦好有層次感。

福岡黑豚生姜丼定食($78)，以福岡黑豚嘅梅頭部位入饌，再加入生薑、日式燒汁、溏心蛋而煮成。梅頭脂肪較少，肉質軟腍，令香甜又帶點微辛嘅燒汁更加入味。丼飯跟送味噌湯。

而家餐廳做緊新店優惠，即like餐廳Facebook專頁或Instagram賬戶，即可免費獲贈「沖繩青檸梳打」1杯，供應期至4月尾。

魚魂98
地址: 旺角豉油街102號鴻都大廈地下3-4號舖

文：Joy