最近旺角有間新開冰室，裝修到成間班房咁，仲有懷舊文具展覽！原來係一間懷舊文具店開嘅餐廳，糅合本土文化、Farm to Table，同冰室美食嘅概念，可以去一邊食嘢，一邊懷緬童年嘅集體回憶！
 

阿銀冰室位於旺角活化唐樓上海街618號當中。負責人Joel喺2016建立銀の文房具，之前曾經有一班米芝蓮廚師去參觀，講咗句「呢度同食物一樣，都可以留畀人美好嘅回憶」。加上有意接觸更多唔同嘅人，就搬到呢度，仲開埋主題冰室！
 

阿銀三文治（蛋白芝士）（$29）

阿銀係呢度最高話事「貓」嘅名，即係冰室Logo上面嘅白貓呀。以白色貓毛開始聯想到白色嘅嘢食，所以呢份阿銀三文治就用咗淺色嘅芝士、蛋白同麵包。烘過嘅香脆麵包夾住鬆軟多汁嘅蛋白，加上芝士嘅鹹香，簡單而滿足。之後亦有打算推出阿銀蛋糕喔！
 

哈哈蝦多士（$50）

餐廳亦想有多啲開心嘅元素，所以蝦多士亦特別改名為「哈哈蝦多士」。坊間冰室比較少見到呢款蝦多士，因此Joel亦落足心機，每日朝早去街市買新鮮蝦，令炸蝦肉食落零舍外脆內彈，蝦肉爽口。配埋酸酸甜甜嘅沙律醬就可以解油膩。
 

焗鮮茄吉列豬扒飯（$65）

常見嘅焗豬扒飯都係將醬汁淋喺炸豬扒同飯上面再攞去焗，呢間冰室就特別將吉列豬扒另上，保留吉列豬扒皮脆肉嫩同Juicy嘅口感！配搭芝士蕃茄汁，非常醒胃。焗飯底粒粒分明，皆因都係每日朝早新鮮炒出嚟嘅。
 

 

香草意粉（價錢待定）

為咗令素食人士都有選擇，呢度都有素食菜式供應。例如呢碟新出嘅香草意粉，青醬調味得宜，再配搭唔同時令蔬菜。Joel認為「不時不食」，當造嘅先係對身體好，希望大家都食得更健康，蔬菜會按季節更換款式。
 

鮮紫蘇檸檬（$36/凍，$32/熱）

紫蘇、薄荷都係餐廳同本地年輕農夫合作，喺自家農場種出嚟，長遠做到Farm to Table。紫蘇茶同樣每日新鮮煲出嚟，再加入檸檬汁令茶湯變得清澈通透。紫蘇富含花青素，而花青素可以幫助抗氧化、提升免疫力，女士嚟講可以抗衰老，而且孕婦都飲得㗎。
 

提倡本土文化，冰室對面嘅銀の文房具，同走廊嘅玻璃櫃上都展出唔同種類嘅懷舊文具，不定期仲會更換主題。
 

阿銀冰室
地址：旺角上海街618號3樓301A及302號舖

文：Cathy
相、片：Calvin Kwok