由百年歷史嘅日本醬料品牌Otafuku共同協辦嘅御好燒專門店，主打廣島御好燒同一系列鐵板燒料理，所用嘅醬料都係Otafuku出品，將廣島同關西嘅獨特風味帶畀大家。不過食之前大家知唔知，廣島燒同大阪燒有咩分別呢？

廣島燒嘅食材係層層疊加，唔會mix埋一齊

廣島燒（$98）

材料層次分明

餐廳嘅廚師團隊同樓面全員都去日本受訓，務求將日本規格完完整整帶嚟香港，嚟緊1月仲請到日籍師傅坐鎮𠻹。招牌廣島燒顧名思義係廣島風味，亦用上最多材料。麵糊、木魚粉、椰菜、麵條、雞蛋等食材逐層疊加，搭配Otafuku獨特嘅廣島燒醬同沙律牆，甜甜酸酸好開胃，食落明顯feel到麵條彈牙嘅口感。

大阪燒加配芝士（$98+$15/款自選配料）

關西風味嘅大阪燒，餅底將椰菜、紅生薑、麵糊等材料混合，冇加入麵條，口感比較爽，要有麵條則可以揀現代燒。若果想特別啲，大阪燒可以加自選配料，如芝士、韓式泡菜、牛肉、帶子等。開飯仔試咗加芝士，食落會多一份甜味同軟綿口感。

廣島蠔燒（$158）

同樣以大阪燒為基底嘅廣島蠔燒，配上鐵板燒廣島蠔，鹹鮮味幾明顯，蠔肉亦算飽滿。

歐姆蛋包麵（$138）

芽菜令口感清爽一點

鐵板燒料理之中，歐姆蛋包麵係人氣款式，經典日式炒麵加入芽菜、紅蘿蔔、豚肉以炒麵醬炒香，再用蛋皮包成四四方方，外形好似玉子燒咁。

和牛鐵板燒（$398）

濃郁醬燒雞（$108）

肉食愛好者不妨試試和牛鐵板燒或濃郁醬燒雞，前者不時轉換牛肉款食，如肉味較濃嘅澳洲和牛，配埋炸蒜片，蘸秘製洋蔥醬或柚子醬都一樣惹味；後者則加入椰菜、蒜蓉醬同炒，鹹香熱辣辣，分量幾啱佐酒。

設有席前座位更顯日式氛圍

餐廳將會推出體驗班教家製作御好燒

御將燒 (雙子匯1期)   
地址: 九龍城啟德協調道12號雙子匯1期食匯堂12樓1號舖

文：Cathy
相、片：Yan Yan