被譽為去到大阪道頓堀必食嘅千房大阪燒，最近嚟到旺角開香港首間分店！Menu大部分同日本本店相近，招牌千房燒、豚玉燒、廣島燒，部分口味仲係海外限定㗎。加上新增嘅鐵板燒同一品料理，選擇豐富實滿足到鍾意食日本菜嘅你。
1973年創業，大阪燒名店千房嘅香港首店坐落旺角新商場T.O.P，可以坐吧檯位睇足廚師席前製作各種料理，或者舒舒服服坐喺卡位，用枱上嘅鐵板保溫。唔少食材例如雞蛋同肉類都由日本空運，小麥麵粉同調味醬汁甚至係品牌自己調配好再運過嚟香港。日本師傅會駐場兩個星期，訓練員工同確保食物質素，保證大家食到同日本店一樣嘅味道。
千房燒（$108）
千房燒即係品牌招牌大阪燒，正宗大阪風味配上豬肉、牛肉、帶子同原隻黑虎蝦！蝦肉做餡料，蝦頭同煎好嘅蝦腳就做埋裝飾，賣相霸氣十足！
食落係經典大阪燒嘅鬆軟口感，香脆嘅蝦腳同薄身嘅鰹魚片增加口感層次。秘製醬汁加上蛋黃醬非常惹味，不過食唔慣嘅話可能會覺得比較鹹。
特盛蔬菜大阪燒（$78）
海外限定口味，重點係加入大量芫荽！其他配料包括豬肉、牛筋魔芋、茄子、蕃茄同芝士。最後再加少少咖喱辣粉同蒜片調味。
食落芫荽香最明顯，加上調味料嘅辣味，係比想象中更加「重口味」嘅一款，如果唔鍾意芫荽嘅朋友建議揀其他口味！
更多【新店直擊】： |
芝味廣島燒（$88）
廣島燒同大阪燒唔同嘅地方在於麵糊比較扁，然後加入大量菜絲、炒麵同煎蛋。而呢款海外限定嘅芝味廣島燒顧名思義會再加芝士，半融芝士加上海苔粉鋪面相當誘人。
食落口感層次豐富，特別一條條有少少燶邊嘅炒麵同爽口嘅菜絲對比明顯。略嫌調味偏鹹，加埋芝士相信比較難一個人食哂成個，特別係女孩子們建議搵朋友Share食好啲。
香脆鐵板餃子（$50）
同樣係海外限定嘅鐵板餃子，比平時食開嘅日式餃子扁得多，因為主要想做出同大阪燒或廣島燒完全唔同嘅香脆口感。煎完記得趁熱食，裡面嘅菜肉餡同餃子皮口感對比先夠明顯。
全熟桃味梳打（$35）
雖然新店開咗無耐，但已經唔少人打電話嚟Book枱，建議大家都最好訂定枱先。大阪燒同廣島燒分量都唔細，記得唔好眼闊肚窄嗌太多變大嘥鬼呀。
千房
旺角彌敦道700號T.O.P This is Our Place4樓409A-409B號舖
文、相、片：Cathy