有冇食過女子汗味同女子腳味嘅炸雞？我都未。但日本有間人氣炸雞店推出過呢兩款味，聽講即係檸檬、芝士等混製而成嘅醬汁，而呢間店最近嚟咗香港開分店呀！不過就好可惜，冇帶埋呢兩款味過嚟咯，但都有成15種新奇嘅炸雞醬口味選擇，好似大根蓉柚子醋、山賊醬呀咁，啱晒鍾意掃街嘅朋友。

炸雞店「天下鳥」喺日本有超過40間分店，仲曾榮獲日式炸雞大賞最高金賞。香港分店則選址大埔一田超巿內，採用日本博多雞，以雞胸肉為主，唐揚粉亦係嚟自日本，即叫即炸。隻隻都熱辣辣，即食嘅話就可以食到香脆嘅口感。不過，食雞之意除咗在於隻雞外，揀啱醬汁仲可以提升整體嘅層次同味道。

15款醬包括明太子蛋黃醬、咖喱蛋黃醬、大根蓉柚子醋、柚子醋蛋黃醬、特色鹽味醬、芥末蛋黃醬、哈瓦娜辣醬、泰國甜辣醬、天露大根蓉、山賊醬、章魚燒醬、塔塔醬、芝士醬、卡邦尼風味醬同埋照燒醬，鹹甜酸辣都有，任君選擇。

明太子蛋黃醬就最鹹香惹味，仲有粒粒明太子咬到；塔塔醬酸酸甜甜咁都好開胃。

想要有多啲口感嘅就推介可以試下大根蓉柚子醋，啖啖蘿蔔蓉有陣清甜感，食多幾嚿都好似唔覺太膩咁。

至於食得辣嘅朋友（溫提，係堅食得至好），不妨挑機哈瓦娜辣醬，唔好睇輕佢橙橙地色嘅醬汁好似冇乜料到咁，食落就知好堅，堅在嗰種辣唔係落到喉嚨先feel到，而係由條脷開始辣出嚟，就算食完成嚿，陣辣味都仲喺口腔內縈繞一段頗長嘅時間，夠晒刺激。

帶多個好消息畀大家，日本章魚燒連鎖店はち八(88)亦同時一齊開業。呢間章魚燒店來頭都唔細呀，係大阪米芝蓮推介小食YAMACHAN嘅姊妹店。

章魚燒用料同製法都同日本一樣，而佢哋最大嘅賣點，就係咬開粒章魚燒，就只係得一粒比平時大粒好多嘅真‧章魚，但就冇晒啲菜呀昆布呀之類嘅佐料。原來係製作時，已經預早將蔬菜、生果、昆布等材料加入湯料內製成漿，食嘅時候一嚟可以冇咁論盡，二嚟可以更專心咁食出章魚嘅鮮味。同樣都係即叫即製，外皮微脆，章魚彈牙有嚼勁，最緊要係唔會成口粉嘅感覺。

醬汁有原味、88特色醬、蛋黃醬同明太子蛋黃醬等6款口味選擇。其中88特色醬加入多款蔬菜等製，味道微甜。

除咗炸雞同章魚燒外，舖頭都仲有其他炸物，例如炸廣島蠔、炸雞軟骨、炸雞皮等等，仲提供炸雞便當，方便各位無飯大大呢~

天下鳥、はち八(88)
地址：大埔超級城B區1-2樓一田超級市場

文、相、片：Kar