正所謂新年新氣象，梗係要襯今年嘅最後一日同新年第一日食好啲啦！一齊睇吓邊度有好嘢食～
除夕倒數晚宴 Paper Moon 
呢間坐擁璀璨維港景致嘅意式餐廳，向來係節日慶祝嘅首選場地，除夕梗係要約埋朋友一齊細味意式佳餚，喺歡樂氣氛中欣賞煙花匯演，為2024年畫上完美句號。今年除夕菜單帶你享受一場海陸盛宴。首先有迎賓小食打響頭炮，然後係鮮甜嘅龍蝦伴牛肝菌薄片，帶出豐富層次嘅海鮮風味。第二道係充滿南意風情嘅大蝦檸檬辣椒意大利雲吞伴粉紅大蝦，酸香微辣，味道相當突出。主菜選擇絕對唔會令你失望，包括嫩滑細膩嘅香煎智利海鱸魚伴雞油菌，每一啖都充滿濃郁菌香；或者味道濃郁嘅M5和牛柳伴鵝肝，肉香同鵝肝香交織，簡直係絕配！甜品方面則有聖誕麵包伴冧酒提子雪糕，倒數完後，餐廳仲會奉上意大利傳統新年美食煙燻豬肉腸伴扁豆，寓意來年事事順利，帶住祝福開始美好嘅2025年！
的士高早午餐 LA VACHE!
圖：今年除夕，呢間人氣巴黎法式扒房會變身成為一個充滿活力嘅的士高派對場地，帶你喺無限美酒同美食中迎接新一年！無限量供應金黃香脆嘅薯條，再配埋招牌美國USDA Prime頂級肉眼牛扒，絕對係肉食控嘅天堂。派對仲有源源不絕嘅氣泡酒、精選葡萄酒同Mimosa特調，熱愛倒數嘅你，記得喺晚上9時後到場，感受滿場歡呼同興奮氛圍！
東瀛早午餐買三送一 Tokio Joe
蘭桂坊呢間日式料理餐廳，今年元旦將推出節日早午餐放題，每位加$238仲可以無限暢飲清酒、紅白餐酒同啤酒，絕對係迎接新一年嘅絕佳選擇！餐單由吞拿魚腩龍蝦卷配海膽、炙燒A5和牛同鱈場蟹掀開序幕，仲有新鮮刺身如吞拿魚腩、北海道帶子、油甘魚、三文魚同甜蝦等等，滿足你對高質刺身嘅所有幻想！同埋多款即叫即做嘅前菜、壽司卷、燒物同炸物都係無限量供應呀。另外可以從多款主菜中揀一款，包括A5佐賀和牛薄燒、牛柳厚燒、照燒海鱸魚扒、龍蝦湯海鮮拉麵或炙燒壽司盛盒，款款都令人垂涎欲滴。甜品選擇亦相當豐富，包括精選雪糕同鮮果拼盤，一定食到捧住個胃肚走！
經典中式節日早午餐 胡同
經典節日早午餐以傳統中菜融入創意手法，帶你喺傳統中菜同創意味道中展開味蕾之旅。多款無限量供應嘅精緻中式小食，經典點心當然有啦，另外創意款則有泡椒蝦餃、松露京蔥和牛燒賣、竹炭魚香鹹水角等，每一啖都充滿驚喜。每枱可以揀選4款主菜，經典推介包括川式香辣爆炒龍蝦、糖醋蝦球同豆酥鱈魚，最後仲有廚師推薦甜品拼盤。如果想再升級，可以額外加選胡同片皮鴨，皮脆肉嫩充滿油香。
意式節慶早午餐 Casa Cucina
以滿滿意式滋味陪你迎接新一年！早午餐由精緻開胃菜開始，包括冷切肉拼盤，有香濃嘅意大利巴馬火腿、開心果意式肉腸同莎樂美腸，帶嚟濃郁嘅地中海風味；仲有香脆可口嘅粟米糕、自家製嘅佛卡夏麵包。主菜選擇亦相當豐富，包括滋味滿分嘅墨魚仔闊扁意粉配魚籽、肉質嫩滑嘅燒春雞配西西里燉茄子，或者可以加$25享用香氣四溢嘅烤和牛里脊Wagyu Picanha，絕對滿足一眾有要求嘅朋友仔！為咗增添節慶氣氛，餐廳提供一小時無限暢飲套餐，價錢$98起，食客可以從酒精同無酒精飲品中自由選擇，無論係氣泡酒、雞尾酒或其他飲品都為餐點錦上添花。
文：Yanica
編：Cathy
