早前菜價急升，令唔少人開始關注本地農業。Farm-to-Table 其實唔難，香港一直有班農友默默耕耘，並有唔少餐廳向農友們引入本地菜，有啲餐廳甚至自設農場實踐有機耕種。當你知道眼前碟菜喺香港即摘即送到，食落都安心又健康啲啦！Keep 住支持本地農業，先可以Keep 住有新鮮本地菜食㗎。
清澈山水種植 端記茶樓
大帽山川龍村內嘅老字號茶樓之一，村內有唔少農田用清澈山水種植西洋菜、通菜，清爽無渣，所以呢度嘅白灼西洋菜係名物嚟㗎！茶樓係自助形式，點心一蒸好就擺出嚟，想食熱辣辣點心就要望實喇。茶樓景觀開揚，一樓露台位重望到大帽山景。
圖：自家菜田新鮮摘 彩龍茶樓
同樣喺川龍村嘅彩龍茶樓，當然沿用村內種植嘅西洋菜啦！同場嘅鵪鶉蛋燒賣、賣少見少嘅芝麻卷都係茶客推薦點心。呢類傳統點心因為手工繁複逐漸消失，想食就快啲嚟喇。
圖：本地農作物創作菜式 Food Garden ETC 
早前有商場聯同多個本地農莊舉辦農作市集，雖然市集活動圓滿結束，但商場率先聯同Food Garden ETC 不定期以新鮮作物創作菜式，早前就推出沙律系列一嚐最純粹嘅原始味道。同場嘅慢煮西班牙脆乳豬、焦糖燉蛋，同埋有一大片西柚嘅果茶都好受歡迎㗎。
圖：自設農場有機耕種零農藥 Cafe 330
Cafe 330 主張低碳飲食，採用自家種植嘅有機蔬菜同其他有機食材，不加味精、盡減調味，令食客專注於天然味道。以蕎麥冷麵沙律為例，微酸開胃，又突出青瓜、甜椒嘅清甜。想喺屋企都食到本地有機菜，同品牌嘅Farmfresh 330 更有多款自家種植蔬果、香草賣，全部不含化學農藥或肥料㗎。
圖：Beverlychan0917、hkbalancedlife
致力支持本土農業 「本地薑」素食店 (裝修中)
喺灣仔藍屋嘅「本地薑」素食店，一向積極聯繫本地農務組織「復耕者聯盟」支持本土農業，將本地有機蔬菜Farm-to-Table，等大家見證香港都可以種到靚菜！早前餐廳招牌菜—五色養生薑黃飯就集合咗5款有機蔬菜，邊5款菜就取決於該星期農青收割嘅當造物。不過餐廳由2022年1月尾起裝修調整，稍後日子會用全新面貌同大家見面，期待一下啦。
圖：文：KateLuk