隨著確診人數不斷增加，醫療負荷超標，大部分輕症狀嘅確診者暫時只能接受居家治療，喺屋企休息。呢個時候，營養飲食特別重要，開飯仔再次請教營養師Eacy Nutrition，提供在家飲食建議，希望有助各位患者早日康復！

高營養價值食物對抗能量耗損
當確診患上新型冠狀病毒，身體對營養素需求量較高，呢個時候應確保患病期進食營養價值高嘅食物，畀身體有足夠嘅營養對抗體內嘅能量耗損。 

1. 攝取足夠嘅熱量+蛋白質
- 有足夠嘅免疫力對抗病毒，避免肌肉流失，有助於恢復日常活動。
- 建議多進食優質蛋白質，有助細胞修復，如肉類（牛肉、豬肉、雞）、蛋類、魚類、海鮮類、奶及奶製品、豆腐、豆類（紅腰豆、鷹嘴豆）等。減少食用含較多鹽分同添加劑嘅加工品，如香腸、煙肉、午餐肉等。

2. 若食慾變差，建議少食多餐
- 部分患者食慾可能會變差，未必能夠進食正餐分量，就算冇明顯飢餓感，建議以少食多餐嘅方式補充熱量，可以隔2-3小時進食1次。
- 若味覺或嗅覺有所改變，可加入天然香料或食材，例如：蒜頭、薑、蔥、香草、番茄、檸檬汁等增加味道，以提升食慾。

3. 多元化飲食，確保攝取足夠營養素
- 呢段時間唔應該節食或偏食，建議多元化飲食以攝取足夠熱量，等身體盡快復原。
- 保持均衡飲食，確保每餐包含五穀類、蛋白質類、蔬菜類同適量脂肪類。
- 同時應選擇唔同顏色嘅蔬果，攝取唔同抗氧化營養素、膳食纖維。

4. 多飲水，多休息，防脫水
- 患病期間亦會增加體內液體流失，容易導致脫水，即使未必覺得口渴或口乾，都要多飲水；而且水分有助保持呼吸道黏膜濕潤，確保身體維持充足水分。
- 多休息，保持充足睡眠。

輕微症狀患者一日四餐菜單例子（由營養師提供）：
**如果本身患有其他慢性疾病，營養需求同分量會因應個別情況有所調整，建議先諮詢醫生或營養師意見。**

早餐：
- 芝士雞蛋三文治 或；
- 吞拿魚三文治+低脂奶1杯 或；
- 蛋花麥皮+高鈣豆奶1杯。

午餐:
- 鮮茄牛肉雜菜通粉+橙 或；
- 蕎麥麵+三色椒焗三文魚柳+車厘茄+奇異果 或；
- 雜菌肉片湯米粉+士多啤梨。

圖：chow928

下午茶:
- 水果1個（例如香蕉、火龍果、蘋果、西柚等）

圖：starrychow

晚餐：
- 白飯/糙米飯+洋蔥煎豬扒+ 番茄雜菜湯 或；
- 白飯/糙米飯+紫菜豆腐蛋花湯 +蒜蓉炒菜 或；
- 白飯/糙米飯 +鮮茄炒雞柳+上湯灼菜。

圖：susannasee

抗疫小百科（預防篇） 營養師建議7大營養素+餐單推介 增強免疫力：（按此）
抗疫小百科（儲糧篇）營養師分享4類食材儲糧秘訣 延長保鮮期：（按此）