就嚟到情人節啦，諗好同另一半去邊慶祝未先？buffet？set dinner？定係打邊爐？點都有一間啱你（bb）心水啩？
鮑魚自助餐 Park café
平時出面食鮑魚閒閒哋都要幾百蚊隻，而家有得任食以鮑魚為主題嘅菜式喎，抵！每位食客都會獲贈一客日式磯燒鮑魚併黑松露羊肚菌芝士焗龍蝦，鮑魚肉質彈牙，龍蝦味道香濃。其他鮑魚菜式仲有鮑魚鮮蝦火龍果沙律、鮑魚蟹肉龍蝦湯泡飯同猴頭菇花膠鮑魚螺頭燉雞湯等。而甜品就以粉紅色系為主，囡囡見到應該會好興奮！
粉紅朱古力心太軟 花月庭
食自助餐梗係要食甜品，而呢度嘅甜品唔止甜，仲甜入心。事關每對情侶都會獲贈粉紅朱古力心太軟，仲可以喺碟上寫低同另一半想講嘅嘢，係sweet嘅！其他食物仲有紅花帶子威靈頓伴牛肝菌汁、和牛涮涮鍋、玫瑰雜莓慕絲伴雪燕等。仲有無限量供應Mövenpick雪糕，聽落都幾吸引。
養顏花膠海參自助餐 柏景餐廳
呢個自助餐就主打花膠同海參，夠晒滋補養顏。菜式有花膠螺頭燉雞、冰花海參燉六福糖水同桂花炒花膠絲等，天氣咁凍食啲暖嘢就啱喇，仲可以補充骨膠原添，女神應該滿意。
花花世界半自助晚餐 帝景軒
唔想食太飽嘅話，半自助晚餐都係一個唔錯嘅選擇。主菜可以揀安格斯牛柳配桂花蜜餞鵝肝或者香煎鱈魚柳虎蝦配洛神花牛油汁，兩者都加入咗花嘅元素，感覺浪漫。而海鮮、刺身、前菜、沙律同甜品就係任食嘅。特別推介賣相可愛嘅朱古力花盆同玫瑰花形狀嘅芒果撻。
DIY甜品半自助晚餐 1+1 吧
同樣係半自助晚餐推介，主菜可以揀香煎美國牛柳拼醬燒波士頓龍蝦。而任食美食當然唔少得各款冰鎮海鮮、刺身、壽司等。特別在甜品方面有DIY Tiramisu小盆栽，畀大家用朱古力餅碎、士多啤梨、紅桑子或者唔同形狀嘅朱古力，為另一半設計獨一無二嘅甜品。
甜王士多啤梨下午茶 八天堂
呢間出名食忌廉包嘅舖頭喺情人節會推出甜王士多啤梨下午茶，有新鮮甜王士多啤梨、甜王果醬忌廉鬆餅、甜王果醬忌廉卷蛋同甜王果醬忌廉多士。影相實呃到唔少like！仲有情人節限定嘅甜王忌廉包，以新鮮忌廉配上甜王士多啤梨果醬，餡料足足有50克咁重！食落香甜得嚟又唔會膩，sweet池晒~~
玫瑰茶香馬卡龍 Tea WG
呢個品牌就以茗茶融入食物入面，好似有香煎法式牛腰肉配上以戀人早餐茶煮成嘅醬汁，仲有波本香草紅茶雪糕配蛋白酥。如果想畀個驚喜另一半嘅話，不如揀埋盒玫瑰茶香馬卡龍吖。餡料由特選大吉嶺同玫瑰花製成，入口帶茶香又唔會太甜。
玫瑰朱古力拿破崙 Villa Villa
試問有邊個女仔唔鍾意玫瑰？呢間餐廳情人節套餐嘅甜品朱古力慕絲拿破崙口感鬆化，朱古力味濃。面頭仲有一塊粉紅玫瑰朱古力，好浪漫喔。而主菜澳洲和牛面頰肉配意大利雲吞就係以紅酒汁燴和牛面頰肉，肉質嫩滑，連雲吞都係心形㗎！
以花入饌 魔膳廚房
情人節唔少男士都會送花畀另一半，如果花係食得嘅會唔會再開心啲呢？唔好睇呢個意大利麵好似無咩特別咁，其實佢係以食用玫瑰花、忌廉同茄汁嚟燴意粉嘅，估唔到個味都幾夾喎。而甜品 紅桑子草莓提拉米蘇就酸酸甜甜，帶淡淡酒香。
粉紅盛宴 The Point
如果講最代表到情人節嘅顏色，應該一定係粉紅色啦。呢間餐廳嘅情人節四道菜晚餐就由頭盤到甜品都係粉紅色，夠晒應節！主菜日本刺身帶子配粉紅忌廉汁天使麵加入咗紅菜頭，配上刺身級帶子，味道鮮甜。而甜品士多啤梨芝士薄餅配雲呢拿雪糕仲係心形添，成餐飯都心心眼啦。
龍蝦火鍋 canton pot
情人節成日都係食西餐？如果想有啲新意嘅其實打邊爐都OK㗎。呢間火鍋店嘅情人節套餐食物好豐富，有原隻龍蝦、澳洲M5級和牛、西班牙黑豚肉同美國桶蠔等食材。而湯底就係龍蝦濃湯拼韓式牛肋骨湯，兩款味道都好香濃，打邊爐之前可以飲少少試下個湯先。
韓牛大餐 炑八韓烤
女朋友最愛睇韓劇，連情人節大餐都想食韓國菜？呢間連鎖韓式烤肉店就啱晒啦，佢哋嘅情人節韓牛套餐主打各種1++級數嘅韓牛部位，包括肉眼粒、牛前胸、牛小排、牛五花等等。套餐包埋韓式年糕串做甜品。最後溫馨提示埋，預先訂座2月13至15號任何一間分店嘅情人節套餐，就會送埋大熱韓劇《鬼怪》當中出現過嘅木棉乾花一扎！數量有限先到先得呀。
文：Crystal