雖然成日都話如果愛對了人，日日都係情人節。但係情人節呢啲日子，「係咁易」同情人食返餐都要嘅，特別係經歷過呢一年，相信大家都覺得可以同愛人一齊食餐開開心心、甜甜蜜蜜嘅飯，已經要珍惜。講真，下個月咩情況大家都唔知，有冇得開返晚巿又唔知，但習慣一早做準備嘅好寶寶都總有嘢可以做嘅，介紹幾個下午茶畀大家，有堂食有外賣，總有個啱心水。

堂食

Pink Pink下午茶自助餐  花月庭  

講起情人節，大家都會諗起一個充滿粉紅泡泡嘅節日，而呢一個粉紅色嘅下午茶就啱晒大家同埋另一半去食啦~ 係久違嘅下午茶自助餐呢，仲要雲集各地嘅士多啤梨，例如韓國、日本同法國，炮製成一系列嘅甜品同埋小食，又香甜又多汁。而千層酥一向係佢哋招牌之一，今次仲推出咗直徑足足有16吋嘅草莓千層酥，口感酥脆，擺滿一粒粒日本士多啤梨，不論男女生都即變心心眼啦～

草莓伊甸園下午茶自助餐
供應日期：即日起至4月4日
供應時間：逢星期六、日及公眾假期，下午3時至5時
價錢：HK$275（成人）  HK$195（小童）

芝士下午茶自助餐  Essence

芝士嘅魅力沒法擋。呢個芝士下午茶buffet，除咗有中西茶點、即製喇沙、同MÖVENPICK雪糕等嘅基本盤之外，主角當然係一系列以芝士做主題嘅美食啦！例如流住「車打芝士溶漿」嘅芝士噴泉，有多款西式切肉同蔬菜伴上、雜錦芝士盤有近15款世界各地嘅芝士，仲有黑松露芝士意粉、韓式炸雞配芝士醬等，成餐都勁「芝」味！

「芝到了」下午茶自助餐
供應期： 即日 至2月28日
供應時間：逢週末和公眾假期，下午3時至5時
價錢：HK$168起

朱古力迷必食 帝景軒

情人節就梗係甜甜蜜蜜㗎啦，食埋以朱古力做主題嘅下午茶就sweet到漏添啦。聯乘Haagen Dazs推出嘅呢個以全新朱古力三重奏系列雪糕為靈感嘅tea，設計出多款包有朱古力、榛子同果仁嘅鹹甜點，例如焦糖杏仁黑朱古力撻、紅桑子橙酒朱古力蛋糕等，當然唔少得兩款朱古力口味雪糕啦。而且餐廳仲有塊落地大玻璃，陽光透入餐廳，啱晒情人們一邊寫意咁享受下午茶，一邊飽覽汀九橋嘅醉人景色。

尊貴朱古力下午茶
供應日期：即日起至3月7日
供應時間：逢星期一至日，下午3:15至5:15
價錢：HK$328兩位用 另加一服務費

「巴黎之約」浪漫下午茶   Green   

 堂食

 外賣套餐

法國、心心、下午茶加埋一齊就係浪漫情人節嘅必勝方程式。呢間酒店嘅下午茶就集合晒呢三大元素，同三大法國著名品牌，包括乳製品牌Elle & Vire、芝士品牌Ile de France同朱古力品牌La Maison du Chocolat合作。一系列嘅甜點以Ile de France芝士製成，而甜品則多以Elle & Vire芝士製作。最吸睛一定係士多啤梨芝士玫瑰撻，層層淡粉紅色嘅花瓣係人手一片一片拼上去呢，夠晒心思。而心心圖案嘅意式雲呢拿奶凍亦係另一打卡之選，口感幼滑甜香。另外，呢個SET亦設有外賣套餐，情侶們買返屋企靜靜地過二人世界亦得。

「巴黎之約」浪漫下午茶
供應日期：即日至3月14日
供應時間：下午3時至5時 或 下午4時至6時
價錢︰兩位港幣688元* 另收加一服務費

「巴黎之約」浪漫外賣下午茶
預訂日期：即日至3月11日
價錢：港幣688元連Moët & Chandon迷你香檳（200毫升）乙枝

「賞花嚐花」下午茶 普慶餐廳 

情人節梗係唔少得花啦，帶另一半試下呢個以花為主題嘅下午茶自助餐就啱晒啦。呢個下午茶足足用咗四十幾款食用花入饌，顏色獨特，其中藍莓蝶豆花奶凍嘅粉藍色更加令人少女心爆發，用粉紅色嘅蝴蝶點綴柔和嘅淺藍色，睇到都令人心情愉快！而且餐廳樓底十分之高，空間感十足，裝修優雅，帶埋另一半嚟休閒咁渡過一個甜蜜嘅情人節，一定令愛人冧曬～

「賞花嚐花」下午茶自助餐
供應時間：由2021年2月12日至3月28日（只限週末及公眾假期供應）
供應時間：下午3時15至5時15分
價錢：HK$248一位   另加一服務費

外賣

精緻優雅外賣下午茶  Three on Canton 

疫情期間乜都有得外賣，下午茶都唔例外。如果想安全啲，唔外出用餐嘅情侶，買set返屋企同另一半一齊嘆都得。造型靚靚好啱打卡～圓盒內有三層架，裝著11款精緻下午茶美點，包括軟芝士慕絲忌廉蛋糕、焦糖牛奶朱古力慕絲等甜點同香焗蘑菇酥、迷你芝士植物肉漢堡等鹹點。

精緻優雅外賣下午茶
供應日期：即日起
供應時間：每日供應（每日最後下單時間為晚上9時)
錢：HK568兩位用

文：Hailey
編：Kar