呢間日本名店總店喺北海道，日本就有六間分店，餐廳兩年前攻港，香港係唯一一間海外分店，主打北海道鄉土料理，大部份食材都係日本直送。佢嘅日式鍋物同招牌天婦羅一向都好受歡迎。最近就新出咗兩款冬季鍋物，啱哂海鮮控同牛魔王！
極上漁師鍋（港幣$560）
首先講吓個湯底，用咗海膽醬、木魚湯同豆乳雞湯製成，湯底呈現橙黃色，好濃郁，味道都係滿滿嘅海膽味，夠哂鮮！配料方面就有大量矜貴海鮮食材，如馬糞海膽、三文魚、赤海蝦、鱈場蟹腳、鯛魚同油甘魚，全部都係刺身級別，鐘意生食同用嚟打邊爐都無問題。不過開飯仔私心建議鱈場蟹腳要放落湯到滾吓佢，蟹肉會吸哂海膽醬嘅味道，而且湯底都會有海鮮嘅味道，最後放埋個白飯落去煮成湯飯，成個飯都係海膽味同蟹味！
骨膠原豆乳和牛鍋（港幣$488）
想食清啲嘅可以考慮吓呢個骨膠原豆乳和牛鍋，湯底係骨膠原豆乳雞白湯，真係有成舊骨膠源波喺湯底度，女士食就啱哂～配料就有日本直送A4級和牛同各種蔬菜，和牛大約淥佢十幾秒就食得，入口即溶！骨膠源波波溶化咗後，會令到湯底越來越杰身，呢個時候落個拉麵，就會有沾麵嘅效果，掛哂湯～
天婦羅七款盛合（$268）
嚟得當然要試埋餐廳名物天婦羅，天婦羅盛合有蟹腳、蝦、白身魚、帶子、南瓜、蘆筍同大蔥，用咗北海道傳統製法製作粉漿，令天婦羅鬆脆得嚟又唔會油膩。
銀鱈魚西京燒（港幣$165）
銀鱈魚西京燒燒完後一啲都唔乾，而且魚肉仲好滑，食落仲有淡淡嘅味噌香氣。
地址: 尖沙咀柯士甸道西1號圓方(Elements)2樓2103-05號舖
文、相、片：Yanica