雖然而家有唔少家用章魚小丸子機，喺屋企都可以自家製小丸子，不過又要準備材料，事後又要清洗，超麻煩！呢間餐廳有得畀食客炮製心水小丸子，實在方便，仲可以同friend一齊開心玩、開心影、開心食添！究竟點玩？快睇開飯仔詳細教學！

即使係不擅煮食嘅客人都唔使驚，枱上會有教學提示，而且開始前店員亦會講解一次架，可以話零難度！

柯打一份八爪魚花丸燒($58)，店員會提供粉漿、8粒八爪魚、8粒年糕、紅薑及天華。

小丸子製法逐步睇：

Step 1：先喺爐上塗上一層油，薄薄哋就OK！

Step 2：將粉漿拌勻，並將一半粉漿倒入小丸子爐最中間嗰8格，倒出界或倒瀉去第二格都無問題。

Step 3：加入八爪魚、年糕、紅薑及天華。

Step 4：待粉漿半熟時，用竹籤沿住爐上分隔線界開。

Step 5：用竹籤將未熟嘅一邊向低，並可將倒咗出界嘅粉漿放埋入未熟嘅小丸子，一齊烘熟。

Step 6：倒入剩餘粉漿，令小丸子逐漸成形。

成形加上無黐底就可以食得啦！進食之前可加入放喺枱面嘅調味料，有小丸燒醬、蛋黃醬、海苔等調味。

自己整嘅果然好味啲，加上粉漿不算厚身，而且油脂感不算重，讚！

等緊小丸子期間，可以用小丸燒醬喺碟上DIY，寫愛的字句又得，寫生日祝福句語又得！

完成！

另一款較為西式口味嘅小丸子──洋風芝士小丸燒($78)，係店內唯一一款無八爪魚嘅小丸子，配料跟芝士，仲有扮八爪魚嘅腸仔！雖然無八爪魚嘅彈牙感，但味道都幾特別，食落好有煙肉味。

溫馨提示，唔好掛住影相而燒燶小丸子呀！

同場加映：4步搞掂盛合御好燒($98)！

Step 1：將魷魚、蝦、八爪魚、椰菜及紅薑攪勻

Step 2：倒入爐中，並將豬肉鋪面

Step 3：翻面

Step 4：食得！

其他食物：

屋台風炒麵有日本粗麵、椰菜、豬肉、雞蛋、蘿蔔及紅薑，做法簡單，將所有配料炒熟，加埋炒麵醬就食得！價錢為$78。

八爪魚蕃茄醃漬$68，浸於醋中嘅八爪魚配以微酸番茄及微辛洋蔥，好醒胃。

地方不大，只有30幾個座位，但空間尚算闊落。

花丸
地址: 尖沙咀寶勒巷10號8樓

文：Joy