臨近年尾同聖誕，一定有好多聚會，同朋友去食下好野就最啱啦！尖沙咀最近新開咗一間高質素日本料理，有齊壽司、刺身、磯燒、鍋物同天婦羅，大部份食材都係日本直送，樣樣都咁高質，去唔到日本可以過嚟止下癮先。

負責人Kelly 細細個就成日去日本，所以由細到大都好中意日本嘅文化，喺英國讀書果陣就去咗一間日本料理店打工，並由低層做起，佢話喺果邊學到唔少日本餐廳嘅文化同埋點整日本菜。餐廳裝修都係由佢一手一腳設計，例如天花嘅燈都係由佢親自去日本採購。

雲丹蟹肉卷($198)、南瀛卷($258)、

呢兩款都係佢地嘅自創卷物，雲丹蟹肉卷上面鋪咗滿滿嘅海膽，真係一啲都唔手軟，食落去同時食到蟹肉同海膽兩種鮮甜。南瀛卷一樣咁豐富，喺卷物外層鋪滿海膽、魚子、拖羅蓉同一大隻牡丹蝦，用嚟打卡呃like 就最啱！

南瀛七點盛($688)、特上壽司盛($468)

食日本野又點可以無刺身同壽司，呢度有提供一啲連鎖壽司店較少有嘅刺身，如平目、金目鯛同金鱔鯛等，簿切平目食得出魚嘅鮮味，金目鯛同金鱔鯛嘅魚皮經過火灸，會有魚油香氣。貪心嘅人可以叫呢個南瀛七點盛，有齊平目、金目鯛、金鱔鯛、大拖羅、油甘魚、帆立貝同牡丹蝦刺身！

海鮮盛合($568)、蟹味噌甲羅燒($68)

磯燒海鮮就夠哂日本風味，全部都大大隻好新鮮，有日本岩手蠔、活鮑魚、帆立貝同虎蝦等，招牌蟹味噌甲羅燒蟹膏好香濃，仲有蟹籽卜卜脆嘅口感，員工仲會專人幫你燒，咁就唔怕燒過龍啦～

A5宮崎和牛壽喜鍋($438)

壽喜鍋配上A5宮崎和牛，油脂豐富得嚟分布均勻，入口即溶，壽喜燒醬汁都係自行調較，同坊間比較就無咁甜。

另外餐廳仲設有一間VIP房，約埋一大班朋友去食好西就啱哂！

南瀛水產

地址: 尖沙咀金馬倫道5號太興廣場5樓

文、相、片：Yanica