晚市堂食終於重開，對唔少Bar & restaurant嚟講絕對係好消息！尖沙咀山林道一向都係美食街，最近就有一間未來感極重嘅酒吧餐廳進駐，主題圍繞宇宙及太空等，佈滿幻彩霓虹燈，一踏入餐廳就覺得自己置身於外太空一樣，啱晒相機食先！雖然餐廳夠晒gimmick，但食物方面一樣唔馬虎，選材認真而且醬汁都係自家製作，想同朋友傾吓偈影張相係唔錯嘅選擇。
油甘魚薄切．三文魚籽（煙燻）（$108）
選用日本油甘魚，調味方面淋上柚子醋，味道清新，洋蔥絲更能提升魚嘅鮮味，三文魚籽同時令味道及口感更豐富。 上枱時嘅煙燻效果啱晒相機食先，而且煙燻味都幾突出。
銀魚柳番茄莎莎多士（$88）
新鮮法包焗至外脆內軟，加上 自家製番茄莎莎醬，用新鮮番茄、洋蔥及乾蔥絲製成，味道會清新啲，加埋銀魚柳及蒜蓉蛋黃醬又幾有特色。
焗芝士蟹像酥皮紙卷（$88）
酥皮卷平時都經常食到，而呢度嘅酥皮紙卷係特意搜羅嚟，坊間比較少見，薄身如紙，所以食落特別香脆。鋪上幾層酥皮紙包裹本地新鮮菠菜、蟹肉、洋蔥絲及芝士，香濃惹味。
更多【新店直擊】： |
焗日本海螺．紅花忌廉汁（$138）
大廚首先將原隻日本花螺起肉，花螺新鮮彈牙。 紅花忌廉汁用藏紅花加入忌廉製成，帶有淡淡花香，加埋芝士味道就更濃厚～
香烤法國BB雞（$188）
選用法國春雞，先醃製一晚令雞肉入味，客人Order時先於焗爐風乾後再焗，然後再煎。BB雞外皮香脆雞肉嫩滑，自家製辣椒汁亦恰到好處，少少辣唔會搶咗雞味。
另外仲有供應多款自家製Mocktails及cocktails，Cosmo night base加入菠蘿汁及蛋白製成，呢杯Refresher 就用士多啤梨+柚子，兩杯味道都好fresh啱晒女士飲。
地址: 尖沙咀山林道29-31號廣利樓地下A號舖
文: Yanica
相: Tom Li