邊個話冬甩就一定係甜品？最近有間新開嘅手工冬甩店，創作咗一系列嘅冬甩，有鹹有甜，用嚟做正餐都仲得！

呢間新店開喺尖沙咀K11商場，期間限定3個月。冬甩以日本麵粉每日新鮮製作，另外仲會加入糯米粉，令到口感食落煙韌得嚟又唔會太硬。每款冬甩都唔同顏色，負責人解釋係以唔同嘅天然粉製成，好似黑色嘅PBJ semifreddo就係用竹炭粉，粉紅色嘅Lemon pie就用紅菜頭粉。

而咁多款甜甜der冬甩，開飯仔最推介HK Milk Tea嗰款雪糕冬甩，奶茶味雪糕味道濃郁，茶味尤其突出。雪糕側邊黏滿粒粒脆多士，口感豐富，仲有支管仔可以自行決定唧幾多煉奶出嚟添。

PBJ semifreddo嘅夾餡有啲似雪糕批嘅感覺，實際上係喺歐美比較流行嘅意式冰糕，外層係士多啤梨脆脆，中間係花生醬餡加自製士多啤梨醬，多多甜少少酸。

而Lemon Pie嘅面層仲有層輕輕燒過嘅半溶棉花糖，不過呢款外型比味道吸引，中間嘅檸檬吉士醬略為酸咗少少。

而鹹點嘅手工熱狗donut包都係佢哋自創，加入埋麵包糠再拎去炸，增加脆口度。食得辣嘅朋友仔必試四川麻辣牛肉配溫泉蛋，主廚特別挑選咗四川、韓國等幾個地方嘅辣椒粉去製作，令到辣都辣得有幾種層次，而且麻香十足。而且麻辣牛肉放喺donut嘅頭同尾，中間係溫泉蛋嘅擺法設計都係有諗過度過。開頭食幾啖啲辣味開始嚟料嘅時候，就啱啱好食返隻蛋balance下，再食埋剩下嘅牛肉，後勁繼續凌厲。

對比下，韓式BBQ豬腩肉就唔算好辣，泡菜、辣椒醬等嘅辣度恰到本分，夾埋大大片生菜一齊食，似生菜豬肉包又似熱狗，係幾惹味。

另外，佢哋更特地邀請咗本地手工啤酒廠Carbon Brews合作，有罐專屬柚子啤Yuja pop! 呢罐手工啤酒以韓式柚子茶為創作靈感，加入新鮮柚子皮同鹽去釀製，少少鹹少少酸咁相當清新，好易入口，同舖頭本身較重口味嘅食物好夾，有種中和嘅作用。

 菠蘿芙蓉花配覆盆子芝士泡沫

'ello
地址：尖沙咀河內道18號K11購物藝術館B2樓Kiosk 2
期間限定：即日起 至 11月15日

文、相、片：Kar