最近有2間咖喱店成為網民bookmark嘅話題店，一間係日本東京過江龍、連人氣韓星朴敍俊同美國歌手Pharrell Williams去原宿都要食嘅咖喱飯名店；另一間係隱匿喺大圍屋苑、突然爆紅嘅本地咖喱屋。究竟兩間有咩特別，又值唔值得推介呢？即刻跟開飯仔出發實試啦～
東京過江龍咖喱名店：日式北印度咖喱
鍾意潮流文化嘅人，去日本旅行總會到訪呢間咖喱店朝聖，事關呢度係由潮流達人Nigo開設嘅品牌，更曾四度入選Tabelog百名店，好受當地人同旅客歡迎㗎，而家喺香港都食到喇！品牌9月初首度開設海外分店，選址喺淺水灣，周遭環境佈滿綠植同噴水池，十足十香港嘅後花園咁。餐廳裝潢沿用原宿店風格，仲帶嚟標誌吉祥物Mr.Cumin嘅擺設，環境舒適又不乏摩登感。
雖然座位唔多，但環境舒適
香港店跟日本店一樣，由日本廚師團隊親自監修咖喱出品，供應5款日式混合北印度風格嘅咖喱，分別有奶油雞咖喱、牛筋咖喱、雞肉乾式咖喱、香辣牛肉咖喱及蔬菜咖喱。餐牌設計幾貼心，分量可揀大、中、細，另有單、雙拼選擇，照顧唔同食客嘅需要。
單拼咖喱飯[小]（$85/小、$100/中、$120/大）
雙拼咖喱飯[小]（$115/小、$130/中、$150/大）
招牌奶油雞咖喱+牛筋咖喱
開飯仔推介要試招牌奶油雞咖喱，咖喱均採用無添加劑嘅香料調製，而呢款入口好重香料味、牛油香突出，濃稠度適中，帶食材顆粒感，整體同日式咖喱嘅香甜路線完全唔同，味道濃烈好多。
奶油雞咖喱表面加上乳酪醬，增添creamy口感同埋平衡味道
想一次試多幾款咖喱，推介選擇雙拼。店員推介開飯仔試牛筋咖喱，質感相比其他款式流質，但係味道溫和，以甜味為主，香料味為次；而牛筋亦燜得恰好幾軟腍。特別啲可以試埋乾式咖喱，將雞肉混合咖喱熬成肉醬口感，冇汁醬但夠惹味，而且雞肉本身有濃厚調味，用嚟送飯一流啊！
牛筋咖喱食落甜甜哋，又幾有驚喜
乾式雞肉咖喱
左：香料薯仔沙律（$45）｜右：Mango Lassi（$45）
Curry Up
地址：淺水灣淺水灣道109號地下116號舖
屋苑爆紅咖喱屋：大阪香料咖喱
大圍村屋一帶有唔少美食，呢間開業近一年嘅咖喱屋正正位於屋苑內，以鼻引路，好快就可以憑咖喱香氣搵到餐廳。店舖主打大阪風格嘅熟成牛油咖喱，老闆阿祖表示：「喺香港開店之前，曾經喺澳洲開過薄餅店，後來疫情期間返嚟香港先開Curry Boy。我做香料咖喱嘅靈感係源自於大阪茄子老爹（なすおやじ），之前去日本食過一次，佢哋用茄子作為咖喱汁底，我覺得好得意。」
呢度嘅咖喱有別於其他日式咖喱，香料味突出而且更濃味
呢度嘅咖喱用上15款蔬果同香料熬製，當中包括丁香、肉桂、葫蘆巴、番茄、本地腰果醬、紅酒等食材慢煮6個鐘，煮成後香氣十足，味道濃郁仲帶蔬果甜味，同坊間食到嘅咖喱味好唔同。不過因為製作需時，而且難以大規模製作，所以最多只可以做到日賣200份咖喱嘅記錄。
店內海報清楚列出咖喱所選用嘅食材
鐵板手打肉餅+味噌燒茄子
店子共供應4款咖喱，分別有黑啤牛肋肉、黑毛豬肉餅、鼠尾草烤雞同味噌燒茄子。阿祖推介最受歡迎嘅黑毛豬肉餅同味噌燒茄子咖喱，前者用咗自家製手打肉餅，以鐵板香烤鎖住水分同時保持彈牙。肉餅烤到表面焦香，雖然未算厚身，但勝在口感實在同香口。
黑毛豬肉餅（$98）
香港嘅咖喱菜式好少會用茄子做配菜，但呢度嘅味噌燒茄子可能會畀到驚喜你。茄子會用味噌醬醃製一晚至徹底入味，有食客order時再放上鐵板香烤，最後灑上長胡椒、富泥土味嘅孜然、芝麻、胡蘆巴等調味。茄子肥美飽滿而且烤到好軟腍，表皮仲有焦脆感，配埋咖喱撈飯一流。
味噌燒茄子（$98）表面特意加上菲律賓零食炸粟米，口感豐富
加$12轉薄餅係另一番風味，蘸咖喱一併食夠惹味
左：阿多波炸雞（$38）｜右：焦糖布甸（$48）
Curry Boy
地址：大圍積運街2-8號海福花園商場地下22號舖
文：Sharon
編：Cathy
相、片：Yan Yan
剪：Tony
